వేసవిలో ఈసారి నమోదైన ఉష్ణోగ్రతల ప్రభావంతో జల వనరులన్నీ వట్టిపోయాయి. తటాకాలు, కాల్వలు, చెరువులు, కుంటల్లోని నీరంతా ఆవిరవ్వటంతో బీళ్లను తలపిస్తున్నాయి. తుంగతుర్తి, దేవరకొండ ప్రాంతంలోని చాలా మండలాల్లోని ప్రజలు తాగునీటికి సైతం తండ్లాడుతున్నారు. జూన్‌ నెలారంభం నుంచే వర్షాలు వస్తాయి.. అరక సాగుతుందన్న అన్నదాతల ఆశలు నెల దాటినా కలగానే మిగిలాయి. తాగు, సాగు నీటి ఇబ్బందులు తప్పాలంటే భూగర్భజలాల రక్షణ, పెంపులే తక్షణ ప్రత్యామ్నాయాలుగా నీటిపారుదల శాఖ భావించింది. జిల్లాలోని చిన్న, మధ్య, భారీ జలవనరుల్లో ప్రవహిస్తున్న నీటిని వీలైనంత మేరకు భూగర్భంలో దాచుకునేలా ప్రణాళికలు రచించింది. ఉమ్మడి జిల్లా పరిధిలోని నదులు, వాగులపై చెక్‌డ్యాంలను నిర్మించేలా ప్రతిపాదనలు రూపొందించింది.
రూ. 300 కోట్లతో 125 చెక్‌డ్యాంలు.. వర్షాలు కురిసిన సమయంలో వాగులు, వంకలు పొంగిపొర్లి ప్రవహిస్తుంటాయి. ఇవన్నీ దగ్గరలోని నదుల్లో కలుస్తూ.. చివరగా సముద్రంలోకి వెళ్లిపోతున్నాయి. నీటి లభ్యత అవసరానికి మించి ఉన్నా.. వాటిని రక్షించుకోలేక పోవడంతో వేసవిలో తీవ్రమైన నీటి ఎద్దడి తలెత్తుతోంది. దీన్ని నివారించేందుకు ఈ వర్షపు నీటికి అడ్డుకట్టలు వేసి.. వృథా జలాలను పాతాళంలో నిల్వ చేసుకునేందుకు భారీగా నిధులు వెచ్చించనున్నారు. దీని కోసం ఉమ్మడి జిల్లాకు 125 చెక్‌డ్యాంలు మంజూరయ్యాయి. వీటి నిర్మాణం కోసం రూ.300 కోట్ల నిధులకు పాలనాపరమైన అనుమతులను సైతం ప్రభుత్వం ఇప్పటికే ఇచ్చేసింది. రెండు విడతలుగా పనులు..జిల్లాకు మంజూరైన 125 ఆనకట్టల నిర్మాణ పనులను రెండు విడతలుగా చేపట్టనున్నారు. అందులో భాగంగా మొదటి విడతలో 63 చెక్‌డ్యాంలను నిర్మిస్తారు. ఇందుకు వ్యయం చేసే రూ.150 కోట్ల నిధులు సైతం విడుదలయ్యాయి. మిగిలిన 62 చెక్‌డ్యాంలను వచ్చే ఏడాదిలో నిర్మిస్తారు. మొదటి విడతలో చేపట్టబోయే పనులు ఈ నెలలోనే ప్రారంభించేందుకు అధికారులు కసరత్తు చేస్తున్నారు.
చెక్‌డ్యాంల నిర్మాణానికి సంబంధించిన అన్ని పనులు ముగిశాయి. క్షేత్రస్థాయిలో రూపొందిన ప్రాథమిక నివేదికలన్నీ ఉన్నతాధికారులకు చేరాయి.త్వరలో వాటికి సాంకేతిక అనుమతులు మంజూరు కానున్నాయి. వెంటనే పనులు ప్రారంభించేందుకు చర్యలు తీసుకుంటాం.ఇప్పటికే టెండర్లు పిలిచేందుకు అవసరమైన ప్రక్రియ సైతం ముగిసింది.
-హామీద్‌ఖాన్‌, ఐబీ సీఈ, నల్గొండ
ఇవీ చూడండి: నేటి నుంచి కొత్త జడ్పీల పాలన
