మల్లన్నసాగర్ ప్రాజెక్టు భూ సేకరణలో భాగంగా సిద్దిపేట జిల్లా తొగుట మండలం ఏటిగడ్డ కిష్టాపూర్ వాసులను ఖాళీ చేయించొద్దంటూ గతంలో ఇచ్చిన మధ్యంతర ఉత్తర్వులను హైకోర్టు పొడిగించింది. పరిహారానికి సంబంధించిన వివాదంలో దాఖలైన రెండు వేర్వేరు పిటిషన్లను విచారించిన ధర్మాసనం.. తదుపరి ఉత్తర్వులు వచ్చే వరకు వారిపై ఎలాంటి చర్యలు తీసుకోకూడదని ఆదేశించింది.
నోటిఫికేషన్ గడువు ముగిసిందని..
మల్లన్నసాగర్ ప్రాజెక్టు కోసం తాము నివాసం ఉంటున్న ప్రాంతంలో భూ సేకరణకు ప్రభుత్వం జారీ చేసిన నోటిఫికేషన్ గడువు ముగిసిందని, చట్టప్రకారం భూ సేకరణ పరిహారం చెల్లించకుండా ఖాళీ చేయించే ప్రయత్నాలను సవాలు చేస్తూ.. నాయిని లింగం అనే వ్యక్తి సహా మరో 35 మంది హైకోర్టును ఆశ్రయించారు. అవివాహితులను ప్రత్యేక కుటుంబంగా పరిగణించి పరిహారం చెల్లించకపోవడాన్ని సవాలు చేస్తూ ఇదే గ్రామానికి చెందిన శ్రీలేఖ అనే యువతి సహా మరో 50 మంది పిటిషన్లు దాఖలు చేశారు. వీటిపై ప్రధాన న్యాయమూర్తి జస్టిస్ హిమా కోహ్లీ, జస్టిస్ బి.విజయ్ సేన్ రెడ్డిలతో కూడిన ధర్మాసనం సోమవారం విచారణ చేపట్టింది.
ఉత్తర్వుల పరిధిని పొడగించలేం
ఈ కేసులో ప్రభుత్వ ప్రత్యేక న్యాయవాది జి.హరేందర్ పరిషద్ వాదనలు వినిపించారు... రెండు పిటిషన్లలోనూ ప్రభుత్వం కౌంటర్లు దాఖలు చేసిందని చెప్పారు. పూర్తి వివరాలను న్యాయస్థానం ముందుంచడానికి కొంత గడువు కావాలని కోరగా ధర్మాసనం అనుమతించింది. పిటిషనర్ తరఫు న్యాయవాది జోక్యం చేసుకుంటూ... గతంలో ఇళ్లను ఖాళీ చేయించొద్దంటూ ఇచ్చిన మధ్యంతర ఉత్తర్వులను పొడిగించాలని కోరారు. గత మధ్యంతర ఉత్తర్వుల ప్రకారం ఖాళీ చేయించకుండా మౌలిక వసతులైన రోడ్లు వంటివి ధ్వంసం చేస్తున్నారని.. వాటిని యథాతథంగా ఉంచేలా ఆదేశాలివ్వాలని విజ్ఞప్తి చేశారు. అందుకు ధర్మాసనం నిరాకరించింది. మధ్యంతర ఉత్తర్వుల పరిధిని పొడిగించలేమని స్పష్టం చేసింది. గతంలో ఖాళీ చేయించరాదంటూ ఇచ్చిన ఆదేశాలను పొడిగిస్తూ.. కేసు విచారణను సెప్టెంబరు 6కు వాయిదా వేసింది.
ఇదీ చదవండి: 20 లక్షల మంది వచ్చినా ఇబ్బందులుండద్దు: కేసీఆర్
