పట్టభద్రుల ఓటర్లను వెనక్కు పంపిన అధికారులు

సమయం మించిపోయిందని ఎమ్మెల్సీ ఓటర్లను ఓటేయకుండా వెనక్కు పంపిన ఘటన సిద్దిపేట జిల్లా హుస్నాబాద్​లో జరిగింది. తమను అనుతించకపోవటంతో ఓటర్లు అధికారులతో వాగ్వాదానికి దిగారు.

సిద్దిపేట జిల్లా హుస్నాబాద్​లో ఎమ్మెల్సీ ఎన్నికల పోలింగ్ కేంద్రంలో సమయం దాటిపోయిందని ఓటర్లను అధికారులు వెనక్కు పంపారు. కొంత మంది పట్టభద్రులు 4 గంటల తర్వాత తమ ఓటుహక్కు వినియోగించుకోడానికి పోలింగ్​ కేంద్రానికి వచ్చారు.

అనుమతి నిరాకరణ

4 గంటల తరువాత పట్టభద్రులకు పోలింగ్ కేంద్రంలోకి అనుమతి లేకపోవటంతో వచ్చిన వారిని భద్రతా సిబ్బంది గేటు బయటే నిలువరించారు. ఆగ్రహించిన ఓటర్లు అధికారులతో వాగ్వాదానికి దిగారు. అక్కడే ఉన్న హుస్నాబాద్ ఎస్సై సుధాకర్ వారితో మాట్లాడి సర్దిచెప్పి పంపించారు.

ఓటర్ స్లిప్​పై 5 గంటల వరకు

ఆలస్యంగా వచ్చిన పట్టభద్రులు తమకు ఇచ్చిన ఓటర్ స్లిప్​లో ఉదయం 8 గంటల నుండి సాయంత్రం 5 గంటల వరకు ఉందని స్లిప్​లను చూపించారు. ఇంకా సమయం ఉందని వచ్చామని... ఇక్కడికి వస్తే 4 గంటల వరకే అంటూ పోలింగ్ కేంద్రంలోకి అనుమతించలేదని వాపోయారు. ఓటు హక్కు వినియోగించుకోలేక నిరాశతో వెనుదిరిగారు.
ఇవీ చూడండి:రైళ్లో తప్పిపోయిన పాప... శిశువిహార్​కు తరలింపు