రంగనాయకసాగర్ నీటి విడుదల.. ఈత కొట్టిన ఎంపీ, ఎమ్మెల్యే

సిద్దిపేట జిల్లా చిన్నకొండూరు మండలం చందలాపూర్​లోని రంగనాయక్​సాగర్​ ప్రాజెక్టు నుంచి మంత్రి హరీశ్ రావు నీటిని విడుదల చేశారు. రైతులు ఏడాదికి రెండు పంటలు పండించుకునే రోజులు వచ్చాయని మంత్రి వ్యాఖ్యానించారు.

సిద్దిపేట జిల్లా చిన్నకొండూరు మండలం చందలాపూర్​లోని రంగనాయకసాగర్ కుడి, ఎడమ కాల్వల నుంచి మంత్రి హరీశ్ రావు నీటిని విడుదల చేశారు. మల్లన్నసాగర్​ నాలుగో గేట్​ ద్వారా ఈఎన్​సీ హరిరామ్ నీటిని విడుదల చేశారు. కాల్వల్లో నీటిని చూసి రైతుల కళ్లల్లో ఆనంద బాష్పాలు చూస్తున్నామని హరీశ్ రావు అన్నారు. రైతులు ఏడాదికి రెండు పంటలు పండించుకునే రోజులు వచ్చాయని హర్షం వ్యక్తం చేశారు. కార్యక్రమానికి హాజరైన ఎంపీ కొత్త ప్రభాకర్​ రెడ్డి, ఎమ్మెల్యే రసమయి కాల్వలో ఈత కొట్టి పులకించారు.

ఇక నుంచి ఆత్మహత్య, కరవు అనే పదాలు వినిపించవని హరీశ్​ రావు ఆశాభావం వ్యక్తం చేశారు. రంగనాయక్​సాగర్​ ద్వారా ఏడాదంతా నీళ్లు వస్తాయని వెల్లడించారు. కుడికాల్వ ద్వారా 40 వేలు, ఎడమ కాల్వ ద్వారా 70 వేల ఎకరాలు సాగవుతాయని తెలిపారు. సిద్దిపేట వాగు కింద 28, నక్కవాగు, పెద్దవాగు కింద ఉండే చెక్​డ్యాంలు, శనిగరం చెరువు నింపుతామన్నారు. వర్షాకాలంలోగా పిల్ల కాల్వలు పూర్తి చేసుకోవాలని సూచించారు. కార్యక్రమంలో ఎంపీ ప్రభాకర్ రెడ్డి, అధికారులు పాల్గొన్నారు.

ఇదీ చూడండి: ఎంత దూరమైనా రైల్ టికెట్ 50రూపాయలే.!