డ్రాపౌట్‌ నుంచి డాక్టరేట్‌ వరకు... రామ్‌ విజయగాథ

ఆయన మూడో తరగతిలో చదువు మానేశారు. పొలాల్లో కూలీగా గొర్రెలు మేపారు. డ్రైవర్‌గానూ పనిచేశారు. మరి ఇప్పుడు ఆయన ఎలా ఉన్నారు? ఏంచేస్తున్నారు? నమ్మగలరా?ఆయన పీహెచ్‌డీ పూర్తిచేసి ఉస్మానియా విశ్వ విద్యాలయంలో సహాయ ఆచార్యునిగా సేవలందిస్తున్నారు. అంతేకాదు అత్యంత ప్రతిష్ఠాత్మకమైన డాక్టర్‌ అంబేడ్కర్‌ ఓవర్‌సీస్‌ పోస్ట్‌ డాక్టోరల్‌ ఫెలోషిప్‌కు ఎంపికయ్యారు. దేశం మొత్తమ్మీద ఎంపికైన ఇద్దరిలో ఆయన ఒకరు. ఇది చదువు ప్రసాదించిన విజయం. నిరంతర కృషి, పట్టుదల, తపనలు అందించిన ఫలితం. ఈ అన్నింటి మేళవింపుతో ఆదర్శంగా నిలిచిన ఆయన రామ్‌ షెఫర్డ్‌.

సిద్దిపేట జిల్లా కోహెడ మండలం రామచంద్రాపూర్‌కు చెందిన బినవేని రాజయ్య, కాంతవ్వ దంపతులకు ముగ్గురు కుమారులు. వారిలో పెద్దవాడైన రామ్‌ గ్రామంలో మూడో తరగతి వరకు చదివారు. అప్పట్లో భారీ వర్షాలతో వరదలు రావడం, పంటలకు తీవ్ర నష్టం కలగడంతో ఎనిమిదేళ్ల వయసులో చదువు మానేశారు. తర్వాత పన్నెండేళ్ల పాటు కూలీగా, వాహన డ్రైవర్‌గా పని చేశారు. తల్లిదండ్రులకు సాయంగా ఉండేందుకు వ్యవసాయం చేశారు. ఓసారి డ్రైవరుగా మహారాష్ట్రకు వెళ్లినప్పుడు అక్కడి విద్యాలయాలు ఉదయం 8 నుంచి 12 గంటల వరకే నడిచే తీరును గమనించారు.

తెలంగాణలో సైతం ఈ విధానాన్ని అమలు చేస్తే బాగుండునని, తాను ఉదయం చదువుకొని, మధ్యాహ్నం పనికి వెళ్లొచ్చని భావించారు. ఇంటికి వచ్చిన తర్వాత అలాంటి అవకాశం ఏదైనా ఉందా? అని తెలిసిన వారిని అడిగితే దూరవిద్య గురించి చెప్పారు. ఏ మాత్రం అలోచించకుండా అంబేడ్కర్‌ ఓపెన్‌ యూనివర్సిటీలో చేరి 2003లో బీఏ పూర్తిచేశారు. ఆ తర్వాత ఉస్మానియా విశ్వవిద్యాలయంలో సోషియాలజీ విభాగంలో క్యాంపస్‌ సీటు సాధించారు. పీజీ (2005) తర్వాత ఓయూలోనే ఎంఫిల్‌ (2007), పీహెచ్‌డీ (2010) పూర్తి చేశారు. ఆంగ్లంపై పట్టు సాధించారు. తెలంగాణ ఉద్యమంలో కీలకపాత్ర పోషించారు.

ఆ తర్వాత నెట్‌లో అర్హత సాధించి ఓయూలో సహాయ ఆచార్యుడిగా ఎంపికై విధులు నిర్వర్తిస్తున్నారు. తాజాగా డాక్టర్‌ అంబేడ్కర్‌ ఓవర్‌సీస్‌ పోస్ట్‌ డాక్టోరల్‌ ఫెలోషిప్‌కు ఎంపికయ్యారు. తాను అమెరికాలోని యూనివర్సిటీ ఆఫ్‌ టెక్సాస్‌ను ఎంపిక చేసుకున్నట్లు రామ్‌ తెలిపారు. ఈ ఫెలోషిప్‌ రెండేళ్లు ఉంటుందని, ఈ సమయంలో సంచార జాతులు, అస్తిత్వం, వారి అభివృద్ధి, సాధికారత నమూనా’ అనే అంశంపై పరిశోధన చేసి ప్రభుత్వానికి నివేదించాల్సి ఉంటుందన్నారు.

రామ్‌ షెఫర్డ్

ప్రతిభ ఇలా..
ప్రస్తుతం సోషియాలజీ బోర్డు ఆఫ్‌ స్డడీస్‌ ఛైర్మన్‌గా వ్యవహరిస్తున్న రామ్‌ వివిధ అంశాల్లో ప్రతిభ చాటుతున్నారు. ఆయన పలు పుస్తకాలు రాశారు. పరిశోధనకు సంబంధించిన 25 ఆర్టికల్స్‌ వివిధ పత్రికల్లో ప్రచురితమయ్యాయి. 2005లో యూజీసీ రీసెర్చ్‌ అవార్డు అందుకున్నారు. సంప్రదాయ వైద్యంతో కరోనాను ఎలా నివారించవచ్చనే అంశంపై ఇటీవల వ్యాసాన్ని రాశారు. దాన్ని చైనాలోని ‘ట్రెడిషనల్‌ మెడిసిన్‌ రీసెర్చ్‌’ అనే అంతర్జాతీయ పత్రిక కవర్‌ పేజీ ఆర్టికిల్‌గా ప్రచురించింది. తర్వాత ఆ వ్యాసాన్ని డబ్ల్యూహెచ్‌వో వారు తమ వెబ్‌సైట్‌లో పొందుపర్చారు.

మన దేశానికి యువత పెద్ద సంపద. నేడు ప్రతి ఒక్కరిలో స్వార్థం పెరిగింది. చదివేది ఒక్క ఉద్యోగం కోసమే కాదు. విద్య అంటే ఓ జ్ఞానం. ఓ నాగరికత, విలువ. వ్యక్తిగత అభివృద్ధికి కాకుండా ప్రతిఒక్కరూ దేశాభివృద్ధికి పాటుపడాలి. నేర్చుకున్న జ్ఞానాన్ని, సంపాదించిన డబ్బులో కొంత భాగాన్ని సమాజానికి తిరిగి ఇవ్వాలి. దేశీయ పరిజ్ఞానంతో పరిశోధనలు చేసి నూతన ఆవిష్కరణల దిశగా అడుగేయాలి.

-- సమాజ శ్రేయస్సుకు పాటుపడాలి : ప్రొఫెసర్‌ బినవేని రామ్‌

ఇదీ చదవండి: నేటి నుంచి వృద్ధులకు కొవిడ్​ వ్యాక్సిన్​