ప్రపంచ పర్యావరణ దినోత్సవ సందర్భంగా సిద్దిపేట జిల్లా నంగునూరు మండలంలోని మగ్దుంపూర్ గ్రామ పరిధిలో మొదటి ఆయిల్ పామ్ మొక్కను మంత్రి హరీశ్ రావు నాటారు. తెలంగాణ రాష్ట్రం ఏర్పడితే రైతుల జీవితాలు బాగు పడతాయని... ఆనాడు కేసీఆర్ చెప్పిన మాట నేడు నిజమైందని పేర్కొన్నారు. కాళేశ్వరం జలాలతో రాష్ట్రంలో సాగుభూమి పెరిగిందని తెలిపారు. పంజాబ్, ఆంధ్రప్రదేశ్ రాష్ట్రాలను తలదన్నే విధంగా... భూమికి బరువైన పంట పండిందని అన్నారు. దేశంలో ఏ రాష్ట్రం కూడా ధాన్యం కొనుగోళ్లు చేస్తలేదని... కేవలం తెలంగాణ రాష్ట్రం మాత్రమే మద్దతు ధరతో ధాన్యం కొనుగోళ్లు చేస్తోందని పేర్కొన్నారు.
ప్రతి ఏటా మన దేశంలో 90 వేల కోట్ల పామాయిల్ను విదేశాల నుంచి దిగుమతి చేసుకుంటున్నామని తెలిపారు. దీనిని నియంత్రించడం కోసం మన దేశం 70 లక్షల ఎకరాల్లో పామాయిల్ తోటలు సాగు చేయాలని అన్నారు. పామాయిల్ సాగు చేయడం వలన వచ్చే లాభాలను సవివరంగా వివరించారు. పామాయిల్ కు బహిరంగ మార్కెట్లో పుష్కలమైన డిమాండ్ ఉందని తెలిపారు. రైతులకు గిట్టుబాటు ధర అందించేలా.. అన్నిరకాల ప్రోత్సాహకాలు కల్పించడానికి ప్రభుత్వం సిద్ధంగా ఉందని తెలిపారు.
పామాయిల్ తోటలు సాగు చేసే రైతులు కేవలం రూ. 6 వేలు కడితే సరిపోతుందని... మిగతా రూ. 1 లక్షా 35 వేల 240 ప్రభుత్వం నుంచి సబ్సిడీ వస్తుందని మంత్రి వివరించారు. వ్యవసాయంలో సీఎం కేసీఆర్ విప్లవాత్మకమైన మార్పులు తెస్తున్నారని పేర్కొన్నారు. తెలంగాణ రైతులను చూసి ఒకనాడు నవ్విన ఆంధ్రా పాలకులు.., నేడు మనల్ని చూసి ఈర్ష్య పడటం గర్వంగా ఉందని తెలిపారు. ఈ కార్యక్రమంలో కలెక్టర్ వెంకట్రామి రెడ్డి, జిల్లా పరిషత్ ఛైర్మన్ రోజా రాధాకృష్ణ శర్మ, ఎఫ్డీసీ ఛైర్మన్ వంటేరు ప్రతాప్ రెడ్డి, సీఎం ఓఎస్డీ దేశపతి శ్రీనివాస్, రైతుబంధు సమితి జిల్లా అధ్యక్షుడు వంగ నాగిరెడ్డి, ఇతర ప్రజాప్రతినిధులు, అధికారులు పాల్గొన్నారు.
ఇదీ చదవండి: Tammineni: 'ఈటల.. భాజపా పంచన చేరటం సిగ్గుచేటు'
