సిద్దిపేట జిల్లా దుబ్బాక ఉప ఎన్నికలో ప్రతీ ఒక్కరూ ఓటు హక్కును వినియోగించుకోవాలని జిల్లా కలెక్టర్, ఎన్నికల అధికారి భారతి హొళికెరి కోరారు. ఈనెల 3న దుబ్బాక ఎన్నికల పోలింగ్ ఉదయం 7.00 గంటల నుంచి సాయంత్రం 6.00 గంటల వరకు సాగుతుందని చెప్పారు. ఓటు హక్కును.. హక్కుగా మాత్రమే చూడకుండా బాధ్యతగా భావించాలన్నారు.
దుబ్బాక నియోజకవర్గం పరిధిలో ఓటింగ్ శాతం పెంచేందుకు స్వీప్ ద్వారా చేపడుతున్న కార్యక్రమాలు, పోలింగ్ కేంద్రాల్లో వృద్ధులు, దివ్యాంగులకు చేస్తున్న ఏర్పాట్లను వెల్లడించారు. ప్రతీ ఓటరు తమ ఓటు హక్కును వినియోగించుకునేలా ఓటర్లను జాగృతం చేసేందుకు స్వీప్ ద్వారా అనేక కార్యక్రమాలను చేపడుతున్నామని చెప్పారు. తెలంగాణ సాంస్కృతిక సారథి ద్వారా పల్లెల్లో ప్రచారం నిర్వహిస్తూ.. ఓటు ప్రాధాన్యతను వివరిస్తున్నామని తెలిపారు.
ప్రచార కరపత్రాలు, స్టిక్కర్లు, ఫ్లెక్సీల ద్వారా అందరికీ అర్ధమయ్యేలా అవగాహన కల్పిస్తున్నామని కలెక్టర్ వివరించారు. పోలింగ్ కేంద్రాల్లో ఓటర్లు భౌతిక దూరం పాటించేలా ఏర్పాట్లు చేస్తున్నామన్నారు. శానిటైజర్లు అందుబాటులో ఉంచుతున్నామని చెప్పారు. ఓటర్లు ప్రలోభాలకు లొంగకుండా తమ ఓటు హక్కును వినియోగించుకొని ప్రజాస్వామ్యాన్ని బలోపేతం చేయాలన్నారు. భారత ఎన్నికల సంఘం ఆదేశాల మేరకు 80 సంవత్సరాల పైబడిన ఓటర్లు, దివ్యాంగులకు, కొవిడ్ బాధితులకు పోస్టల్ బ్యాలెట్ సౌకర్యం కల్పించామన్నారు.
ఇదీ చదవండి: రామగుండం బొగ్గు గనిలో ప్రమాదం.. ఒకరు దుర్మరణం
