సొంత ఊరితో ఉన్న జ్ఞాపకాలు వారి కాళ్లను కట్టి పడేస్తున్నా..తప్పనిసరై ఒక్కో కుటుంబం ఊరు వదిలివెళ్తోంది. తమ వంతు కూడా ఏదో ఒక రోజు వస్తుందనే దిగులుతో మిగిలిన వారి కళ్లు చెమ్మగిల్లుతున్నాయి. సిద్దిపేట జిల్లాలోని మల్లన్నసాగర్ ముంపు గ్రామాలైన పల్లెపహాడ్‌, వేములఘాట్‌లలో నెలకొన్న ఉద్విగ్న సన్నివేశాలు కలచివేశాయి.
సాగు, తాగునీటి కష్టాలను తీర్చేందుకు ప్రభుత్వం 50 టీఎంసీల సామర్థ్యంతో జలాశయం నిర్మించతలపెట్టిన విషయం తెలిసిందే. జలాశయం పనులు చివరి దశకు చేరడంతో ముంపు గ్రామాలైన పల్లెపహాడ్‌, వేములఘాట్‌ గ్రామాల ప్రజలు రెండు రోజులుగా వారికి కేటాయించిన ఆర్‌ అండ్ ఆర్‌ కాలనీకి (రిహాబిలిటేషన్‌, రీసెటిల్‌మెంట్‌) తరలి వెళ్తున్నారు. బుధవారం ఆయా గ్రామాల్లో పలు కుటుంబాలు ఊరు విడిచి వెళ్తున్న సమయంలో చుట్టు పక్కల వారిని చూస్తూ కంటతడి పెట్టుకున్నారు. ఇంతకాలం ఈ మట్టితో ఉన్న అనుబంధాన్ని ఒక్కసారిగా వదిలేయడం ఎలా అంటూ ఆవేదన చెందారు. చదివిన బడి, మొక్కిన గుడి, తిరిగిన వీధులు, అన్నీ ఒక్కసారిగా మాయమైపోతుంటే ఉండేదెలా అంటూ రోధించారు.
వేములఘాట్‌ గ్రామానికి ఆర్‌ అండ్ ఆర్‌ కాలనీలో 396 కుటుంబాలకు పునరావాసం కల్పించారు. బుధవారం 57 కుటుంబాలు గ్రామాన్ని ఖాళీ చేసి కొత్త కాలనీకి చేరుకున్నాయి. ఇప్పటికి ఆ గ్రామంలో 173 కుటుంబాలు ఖాళీ చేశాయి. పల్లెపహాడ్‌లో ఇప్పటివరకు 423 కుటుంబాలకు పునరావాసం కల్పించగా 58 కుటుంబాలు కొత్త ఇళ్లలో గృహ ప్రవేశాలు చేశాయి.
