ప్రేమకై యువకుడి పోరాటం.. గూడు కోసం గద్ద ఆరాటం..

అసలే వేసవికాలం... తొమ్మిదికాక ముందే సూర్యుడు నిప్పులు కక్కుతున్నాడు. ఆ యువకుడు ఎండను కూడా లెక్క చేయలేదు. ప్రేమించిన అమ్మాయితో పెళ్లి జరిపిస్తేనే... కిందికి వస్తానని శపథం చేశాడు. పిల్ల కోసం టవర్​ ఎక్కాడు. కుటుంబసభ్యులు, బంధువులు నచ్చజెప్పారు. ఇంకేముంది పెళ్లికి ఒప్పుకున్నారు అనుకునే లోపే... కథ అడ్డం తిరిగింది. ఇంతకూ ఏమైంది?

తానొకటి తలిస్తే... దైవం మరొకటి తలిచినట్లైంది సంగారెడ్డి జిల్లా కంది మండలానికి చెందిన యువకుడికి. ప్రేమించిన అమ్మాయితో పెళ్లి జరిపించకపోతే... ఆత్మహత్య చేసుకుంటానని బెదిరించాడు. అంతేనా సెల్​టవర్​ కూడా ఎక్కేసాడు. కోరుకున్న అమ్మాయిని పెళ్లి చేసుకునేందుకు చివరకు బంధువులంతా ఒప్పుకున్నారు. ఇంకేముంది సంతోషంగా టవర్​ దిగబోయాడు. ఇక్కడే కథ అడ్డం తిరిగింది.

గద్ద వెంటపడింది...

టవర్​ దిగుదాం అనుకునే సరికి ఓ గద్ద అతనిపై దాడి చేసింది. ఒకసారి కాదు పలుమార్లు పదేపదే దాడి చేసింది. కిందకు దిగేంత వరకు ఆపలేదు. అసలేం జరగిందంటే.. యువకుడి టవర్​పై నిలబడినప్పుడు పక్కనే గూడు ఉంది. ఆ యువకుడు తన ఆవాసాన్ని ఎక్కడ పడేస్తాడోనని భయపడ్డ గద్ద అతనిపై దాడి చేసింది. టవర్ దిగేంత వరకు ఇదే పరిస్థితి. గద్ద దాడి నుంచి తప్పించుకుంటూ.. బతుకు జీవుడా అంటూ బయటపడ్డాడు మన ప్రేమికుడు.

ఇదీ చూడండి: 'మెదక్​తో మెజార్టీ విషయంలో పోటీ కష్టమే'