సంగారెడ్డి జిల్లా బొల్లారంలో దారుణం చోటుచేసుకుంది. దొంగతనం చేశాడన్న అనుమానంతో 70 ఏళ్ల వృద్ధుడిని కార్యాలయం గేటుకు కట్టేశారు పురపాలక అధికారులు. స్థానిక చర్చి బస్తీలోని తాగునీటి పైపులైన్ గేట్ వాల్వ్ చోరీ చేశాడన్న అనుమానంతో జంగయ్య అనే వృద్ధున్ని ఇన్స్పెక్టర్ వినయ్ తమ కార్యాలయ ప్రధాన గేటుకు తాళ్లతో కట్టి బంధించాడు.
సంబంధం లేదన్నా వినిపించుకోలేదు...
తనకు చోరీతో ఎటువంటి సంబంధం లేదని వారిస్తున్నా వినకుండా జంగయ్యను అలానే గేటుకు కట్టేశారు. ఈ విషయం పురపాలక కమిషనర్ దృష్టికి వెళ్లడం వల్ల అతన్ని విడిపించి లోనికి తీసుకొచ్చారు. మరోసారి దొంగతనానికి పాల్పడనని అతనితో హామీ పత్రం రాయించుకుని వదిలేశారు.
అధికారుల తీరుపై విమర్శలు
నేరం చేస్తే కేసు పెట్టకుండా గేటుకు కట్టేసిన సానిటరీ ఇన్స్పెక్టర్ వినయ్ పైన చర్యలు తీసుకోకుండా జంగయ్యతో హామీ పత్రం రాయించుకున్న కమిషనర్ తీరుపై విమర్శలు వ్యక్తమవుతున్నాయి.
