హరితహారం వల్లే రాష్ట్రంలో సమృద్ధిగా వర్షాలు: రంజిత్​రెడ్డి

కేంద్ర ప్రభుత్వం తీసుకొచ్చిన వ్యవసాయ బిల్లుల వల్ల రైతులకు తీవ్ర నష్టం వాటిల్లుతుందని ఎంపీ రంజిత్​రెడ్డి ఆరోపించారు. ఎమ్మెల్యే ప్రకాశ్​గౌడ్​తో కలిసి హిమాయత్​సాగర్​ వద్ద గంగమ్మ తల్లికి ప్రత్యేక పూజలు నిర్వహించారు.

ముఖ్యమంత్రి కేసీఆర్ ముందు చూపుతో చేపట్టిన హరితహారం కార్యక్రమం వల్ల నేడు రాష్ట్రంలో సమృద్ధిగా వర్షాలు కురుస్తున్నాయని చేవేళ్ల ఎంపీ రంజిత్​రెడ్డి పేర్కొన్నారు. ఎమ్మెల్యే ప్రకాశ్​గౌడ్​తో కలిసి హైదరాబాద్​ నగర శివారు రాజేంద్రనగర్ పరిధి హిమాయత్​సాగర్​ వద్ద గంగమ్మ తల్లికి ప్రత్యేక పూజలు నిర్వహించారు.

ముఖ్యమంత్రి కేసీఆర్ తెలంగాణ రాష్ట్రాన్ని బంగారు తెలంగాణగా మార్చేందుకు అనేక సంక్షేమ పథకాలు రూపొందిస్తుంటే.. కేంద్ర ప్రభుత్వం మాత్రం రైతులకు అన్యాయం చేసే విధంగా వ్యవహరిస్తుందని రంజిత్​రెడ్డి మండిపడ్డారు. కేంద్ర ప్రభుత్వం తీసుకొచ్చిన వ్యవసాయ బిల్లుల వల్ల రైతులకు తీరని నష్టం వాటిల్లుతుందని ఆవేదన వ్యక్తం చేశారు. ఈ బిల్లులను తీవ్రంగా వ్యతిరేకిస్తున్నామని తెలిపారు. కార్యక్రమంలో స్థానిక మేయర్, డిప్యూటీ మేయర్, కార్పొరేటర్లు, నాయకులు, జలమండలి అధికారులు తదితరులు పాల్గొన్నారు.

మరోవైపు హిమాయత్​సాగర్ పూర్తి స్థాయి నీటి మట్టం 1763 అడుగులకు గానూ ప్రస్తుతం 1760 అడుగులకు చేరింది. ఏ క్షణమైనా ​ గేట్లు ఎత్తే అవకాశం ఉన్నందున.. అధికారులు మూసీ పరివాహక ప్రాంతాల ప్రజలను అప్రమత్తం చేశారు.