రాష్ట్రంలో అభివృద్ధి, సంక్షేమానికి ముఖ్యమంత్రి కేసీఆర్‌ పెద్దపీట వేస్తున్నామని చేవెళ్ల ఎంపీ డాక్టర్ గడ్డం రంజిత్రెడ్డి తెలిపారు. సోమవారం షాబాద్ మండల కేంద్రంలోని పహిల్వాన్‌ చెరువుకట్టపై రూ.1.25 కోట్లతో నిర్మించిన సీసీ రోడ్డు, రూ.50లక్షలతో నిర్మించిన పీఏసీఎస్‌ నూతన భవనం, రూ.20లక్షలతో కేశవగూడలో సీసీ రోడ్డు పనులను ఎంపీ రంజిత్రెడ్డి ప్రారంభించారు. అనంతరం పహిల్వాన్‌ చెరువు బతుకమ్మ ఘాట్‌ వద్ద పూజలు నిర్వహించారు.
హైదరాబాద్ నగరంలోని దుర్గం చెరువు మాదిరిగా పహిల్వాన్‌ చెరువును అభివృద్ధి చేసి బోటింగ్‌ ఏర్పాటుకు కృషి చేస్తానని ఎంపీ రంజిత్రెడ్డి తెలిపారు. ఎంపీ నిధులతో ఆయా గ్రామాల్లో మిగిలిపోయిన రోడ్ల నిర్మాణం పూర్తి చేస్తామన్నారు. పహిల్వాన్‌ చెరువుకు 400 ఏళ్ల చరిత్ర ఉందని, ఈ చెరువు నిండితే ఆయకట్టు కింద 4 వేల ఎకరాల్లో రైతులు వరిపంట సాగు చేసుకుంటారని వెల్లడించారు. కార్యక్రమంలో రంగారెడ్డి జిల్లా పరిషత్‌ చైర్‌పర్సన్‌ తీగల అనితారెడ్డి, ఉమ్మడి రంగారెడ్డి జిల్లా ఎమ్మెల్సీ డాక్టర్ పట్నం మహేందర్‌రెడ్డి, చేవెళ్ల ఎమ్మెల్యే కాలె యాదయ్య, డీసీసీబీ చైర్మన్‌ బుయ్యని మనోహర్‌రెడ్డి, జడ్పీటీసీ అవినాశ్‌రెడ్డితో పాటు ఇతర నేతలు, అధికారులు పాల్గొన్నారు.
ఇవీ చూడండి: గ్రామకంఠంలోని ఆవాసాలకు పాస్పుస్తకాలు
