పాడిపరిశ్రమకు మరింత ఊతమిచ్చేందుకు రాష్ట్ర ప్రభుత్వం రూ.246 కోట్లతో విజయ మెగా డెయిరీ ప్రాజెక్టును చేపడుతోంది. రంగారెడ్డి జిల్లా రావిర్యాల వద్ద 32 ఎకరాల్లో నిర్మించనున్న దీనికి ఈ రోజు భూమిపూజ చేస్తున్నట్లు పశుసంవర్ధక శాఖ మంత్రి తలసాని శ్రీనివాస్‌యాదవ్‌ తెలిపారు. నెయ్యితో తయారు చేసిన 13రకాల స్వీట్ల మార్కెటింగ్‌ను కూడా ప్రారంభిస్తున్నట్లు ఆయన చెప్పారు. కొత్త ప్లాంటులో 5 లక్షల నుంచి 8 లక్షల లీటర్ల వరకు పాల శుద్ధిప్లాంటు, 5 వేల లీటర్ల ఉత్పత్తి సామర్ధ్యం కలిగిన ఐస్‌ క్రీం ప్లాంటు, రోజుకు లక్ష లీటర్ల టెట్రా పాల ప్యాకెట్‌ ఉత్పత్తి ప్లాంటులతో పాటు నెయ్యి, బటర్‌, ఫ్లేవర్డ్‌ మిల్క్‌ తయారీ కేంద్రాలను ఏర్పాటు చేస్తామని చెప్పారు.
2014లో విజయ డెయిరీ టర్నోవర్‌ రూ.310 కోట్లు కాగా అది ఇప్పుడు రూ.750 కోట్లకు పెరిగిందని మంత్రి తలసాని అన్నారు. సీఎం కేసీఆర్ ప్రోత్సాహంతో లాభాలబాట పట్టిందని చెప్పారు. ‘విజయ’ ఉత్పత్తులను వినియోగదారులకు మరింత చేరువ చేయడానికి ప్రస్తుతం 600గా ఉన్న విజయ డెయిరీ ఉత్పత్తుల విక్రయ కేంద్రాలను రాష్ట్ర వ్యాప్తంగా పెద్ద సంఖ్యలో ప్రారంభిస్తున్నట్లు వివరించారు. తెలంగాణ విజయ డెయిరీ ద్వారా 28 రకాలకు పైగా ఉత్పత్తుల తయారీ, విక్రయాలు జరుగుతున్నాయని.. మున్ముందు వాటిని 50కి పెంచుతామని తలసాని పేర్కొన్నారు.
ఇదీ చదవండి: CM KCR: ఆ ముగ్గురిని కలిశాకే హైదరాబాద్కు సీఎం కేసీఆర్!
