ప్రజా సమస్యల పరిష్కారంలో కేంద్ర- రాష్ట్ర ప్రభుత్వాల తీరుకు నిరసనగా సీఐటీయూ నేతలు చేపట్టిన పాదయాత్రను బాలాపూర్లో పోలీసులు అడ్డుకోవటంపై సీపీఎం పార్టీ శ్రేణులు ఆగ్రహం వక్తం చేశాయి. ఈ మేరకు రంగారెడ్డి జిల్లా యాచారం మండల కేంద్రంలో నిరసన చేపట్టారు. రహదారిపై బైఠాయించి.. కేంద్ర, రాష్ట్ర ప్రభుత్వాలకు వ్యతిరేకంగా నినాదాలు చేశారు.
ఫలితంగా రోడ్డుపై వాహనాలు భారీగా నిలిచిపోయాయి. రంగంలోకి దిగిన పోలీసులు.. చెదరగొట్టే ప్రయత్నం చేశారు. ఈ క్రమంలో పరిస్థితి ఉద్రిక్తంగా మారింది. పలువురు కార్యకర్తలను అదుపులోకి తీసుకున్నారు. ఈ సందర్భంగా మంచాల మండల మాజీ ఎంపీపీ శ్రీనివాస్ నాయక్ మాట్లాడుతూ.. ప్రభుత్వాల తీరుపై మండిపడ్డారు. శాంతియుతంగా చేస్తున్న పాదయాత్రను అడ్డుకోవటం సిగ్గుచేటన్నారు.
అరెస్టులతో ప్రజా ఉద్యమాలను అణిచివేయలేరని స్పష్టం చేశారు. అరెస్ట్ అయిన ఎస్ వీరయ్యతో పాటు ఇతర కార్మిక సంఘాల నాయకులను తక్షణమే విడుదల చేయాలని ప్రభుత్వాన్ని డిమాండ్ చేశారు.
ఇదీ చదవండి: గుజరాత్ రాజకీయాల్లో అనూహ్య మలుపు.. తదుపరి సీఎం ఎవరు?
