కరోనా కష్టకాలంలో రవాణా సౌకర్యం కల్పించాలనే ఉద్దేశంతో ఆర్టీసీ బస్సులను నడుపుతున్నారు. కొన్ని రోజులుగా బస్సులో నలుగురైదుగురు మించి ప్రయాణికులు ఉండటం లేదు. దీంతో ఉదయం 11 నుంచి మధ్యాహ్నం 4 మధ్య దాదాపు 40 శాతం బస్సులను సంస్థ రద్దు చేస్తోంది. కరోనాకు ముందు 33 లక్షలుండే ప్రయాణికులు.. ఇప్పుడు 8 లక్షలు దాటడం లేదని అధికారులు చెబుతున్నారు. ఇంధన డబ్బులు కూడా రాని పరిస్థితుల్లో కొన్నింటిని తగ్గిస్తున్నామంటున్నారు. దూర ప్రాంతాలకు వెళ్లే బస్సులు కూడా 30 శాతం వరకూ రద్దయ్యాయని రంగారెడ్డి రీజియన్‌ అధికారులు చెబుతున్నారు. నగరం నుంచి దూర ప్రాంతాలకు వెళ్లే ఎక్స్‌ప్రెస్‌ రైళ్లను ఇటీవల 10 వరకు రద్దు చేస్తే.. ముంబయికి రాకపోకలు సాగిస్తున్న ఆరు రైళ్లను గురువారం రద్దు చేశారు. పరిస్థితులు సాధారణ స్థితికి రావడంతో ఏప్రిల్‌ 1 నుంచి 20 రైళ్లను పునరుద్ధరించి మొత్తం 70 శాతం రైళ్లను నడుపుతుండగా.. నెలాఖరు నాటికి రద్దు చేసుకోవాల్సిన దుస్థితి.
ఆటోలు.. క్యాబ్‌లదీ అదే పరిస్థితి
నగరంలో ఆటోలు 2.20 లక్షలుండగా.. క్యాబ్‌లు 70 వేల వరకూ ఉండేవి. కరోనా మొదటి వేవ్‌తో చాలా మంది కుదేలవ్వగా.. రెండో వేవ్‌ వారిని రోడ్డు ఎక్కనీయడం లేదు. రాత్రి పూట వచ్చే బస్సులు, రైళ్లు కూడా తగ్గిపోవడంతో.. ఆటోలకు గిరాకీ లేకుండా పోయింది. నిర్మానుష్యంగా మారిన రహదారుల్లో, కాలనీల్లో.. అంబులెన్సులు మౌనంగా వెళ్లి అవసరమైన వారికి సేవలందిస్తున్నాయి. వీధుల్లోనూ సందడి తగ్గింది.
ఇదీ చూడండి: కరోనా బాధితులా.. ఆదుకొనే ఆసుపత్రులివే!
