మత రాజకీయాల్లో కాదు అభివృద్ధిలో పోటీ పడండి: కేటీఆర్

రాజన్న సిరిసిల్ల జిల్లాలో పురపాలక శాఖ మంత్రి కేటీఆర్ పర్యటించారు. పలు అభివృద్ధి కార్యక్రమాలను ప్రారంభించారు. జిల్లా ప్రజలకు పలు హామీలనిచ్చారు. తెరాస ప్రభుత్వం అన్ని వర్గాల అభివృద్ధికి కట్టుబడి ఉందని పేర్కొన్నారు.

రాజన్న సిరిసిల్ల జిల్లాలో ఏప్రిల్ నెలాఖరు కల్లా లక్షా 24 వేల మందికి వ్యాక్సిన్ ఇవ్వడమే లక్ష్యంగా ముందుకు వెళ్తున్నామని ఐటీ, పురపాలక శాఖ మంత్రి కేటీఆర్ అన్నారు. రాజన్న సిరిసిల్ల జిల్లాలో సోమవారం పర్యటించారు. జిల్లా ప్రధాన ఆస్పత్రిని ఆయన ఆకస్మికంగా సందర్శించారు. ఆస్పత్రిలో ఉన్న సౌకర్యాలను, కొవిడ్ వ్యాక్సినేషన్, పరీక్షలకు సంబంధించిన వివరాలను వైద్యాధికారులను అడిగి తెలుసుకున్నారు.

వైద్యులు సంసిద్ధం...

జిల్లాలో కరోనా బారిన పడ్డ రోగులకు సరిపడే అన్ని సౌకర్యాలు జిల్లా ఆస్పత్రిలో అందుబాటులో ఉన్నాయని... వారికి చికిత్స అందించేందుకు వైద్యులు సంసిద్ధంగా ఉన్నారని మంత్రి తెలిపారు. ఇప్పటివరకు జిల్లాలో 3,200ల యాక్టివ్ కేసులు ఉండగా... 18 మంది మృతి చెందినట్లు తెలిపారు. త్వరలోనే వేములవాడ పట్టణంలో ఏర్పాటు చేసిన వంద పడకల ఆసుపత్రిని అందుబాటులోకి తీసుకొస్తామని పేర్కొన్నారు. అందుకు సంబంధించిన వైద్య సిబ్బందిని వారం రోజుల్లోనే నియామకం చేసి సకల సౌకర్యాలతో ఆసుపత్రిని ప్రజలకు అందుబాటులోకి తీసుకొస్తామని మంత్రి కేటీఆర్ హామీ ఇచ్చారు. మళ్లీ రాష్ట్రంలో కర్ఫ్యూ, లాక్​డౌన్ పరిస్థితులు రావద్దంటే ప్రతి ఒక్కరూ మాస్క్, సామాజిక దూరం పాటించాలని కోరారు.

గ్రంథాలయం పరిశీలన...

జిల్లా కేంద్రంలోని ఆధునిక గ్రంథాలయాన్ని కేటీఆర్ పరిశీలించారు. అక్కడే ఉద్యోగాలకు సన్నద్ధమవుతున్న అభ్యర్థులతో ముచ్చటించారు. గ్రంథాలయంలో సరిపడా వసతులున్నాయా? అని అడిగి తెలుసుకున్నారు. గ్రంథాలయంలో అదనపు కంప్యూటర్లు కావాలని వారు కోరారు. ప్రత్యేక గదిలో ప్రోజక్టర్‌ను ప్రారంభించారు. జిల్లాకు మంజూరైన బీసీ స్టడీ సర్కిల్ ద్వారా అభ్యర్థులకు వివిధ పాఠ్యాంశాలపై నిపుణులైన అధ్యాపకులతో ప్రత్యక్ష బోధన అందుబాటులోకి తీసుకువస్తున్నట్లు తెలిపారు.

యూపీఎస్సీ గ్రూప్స్ తదితర పోటీ పరీక్షలకు సిద్ధమయ్యేవారికి సంబంధిత స్టడీమెటీరియల్‌ను అందుబాటులో ఉంచుతామన్నారు. పోటీ పరీక్షలకు సిద్ధమయ్యే జిల్లా యువతకు ఆధునిక వసతులతో కూడిన గ్రంథాలయాన్ని సద్వినియోగం చేసుకోవాలని మంత్రి కేటీఆర్ సూచించారు.

అభివృద్ధి పనులు...

అనంతరం ఇల్లంతకుంట మండల కేంద్రంలో కేటీఆర్ పర్యటించారు. మార్కెట్ యార్డు, సెంట్రల్ లైటింగ్ సిస్టం, మహిళా సంఘం భవనం, తహశీల్దార్ నూతన కార్యాలయం, వారసంత, రైతు వేదిక భవనాలను ఎమ్మెల్యే రసమయి బాలకిషన్​తో కలిసి ప్రారంభించారు. మండుటెండలో సాగునీరు అందించిన ఘనత తెరాస ప్రభుత్వానిదేనని ఉద్ఘాటించారు. భూ నిర్వాసితుల త్యాగం మరువలేనిదని కొనియాడారు.

ఇల్లంతకుంట అభివృద్ధికి బాటలు వేసేందుకు కృషి చేస్తానని మంత్రి అన్నారు. సిద్దిపేట నుంచి ఇల్లంతకుంట వరకు ఫోర్ వే రోడ్​ మంజూరుకు సీఎం కేసీఆర్ ఒప్పుకున్నారని తెలిపారు. పొత్తూరు నుంచి గాలిపెల్లి మీదుగా ఇల్లంతకుంట వరకు టూ వే రోడ్డు ఏర్పాటు చేయాలని కోరగా కృషి చేస్తామని తెలిపారు. 30 పడకల ప్రభుత్వ ఆసుపత్రి ఏర్పాటుకై గతంలో ఇచ్చిన మాటకు రుణపడి ఉంటానని హామీ ఇచ్చారు.

ఏం చేశారో చెప్పాలి...

కేంద్రం నుంచి నిధులు తీసుకురాలేని భాజపా నాయకులు... ముఖ్యమంత్రిని విమర్శిస్తూ... మత రాజకీయాలు చేస్తున్నారు. రాష్ట్రాభివృద్ధి కోసం కేంద్రం నుంచి నిధులు, ప్రాజెక్టులకు జాతీయహోదా తీసుకురావాలి. ఈ ఏడాది రైతుల కోసం 6,700 ధాన్యం కొనుగోలు కేంద్రాలు ఏర్పాటు చేస్తున్నాం. ఇల్లంతకుంటలో 30 పడకల ఆస్పత్రిని నిర్మిస్తాం. బండి సంజయ్‌ కరీంనగర్‌ ఎంపీగా గెలిచి రెండేళ్లయినా... నియోజకవర్గ అభివృద్ధికి ఏంచేశారో చెప్పాలి.

-- పురపాలక శాఖ మంత్రి కేటీఆర్

ఉద్రిక్తత...

రాజన్నసిరిసిల్ల జిల్లా ఇల్లంతకుంట మంత్రి కేటీఆర్‌ పర్యటనలో ఉద్రిక్తత చోటు చేసుకొంది. ఉద్యోగాల భర్తీ, నిరుద్యోగభృతి ఇవ్వాలంటూ.... ఏబీవీపీ నాయకులు కేటీఆర్‌ కాన్వాయ్‌ని అడ్డుకునేందుకు యత్నించారు. ఇదే సమయంలో 30 పడకల ఆస్పత్రి హామీ నెరవేర్చాలంటూ.. కాంగ్రెస్‌ కార్యకర్తలు ఆందోళనకు దిగారు. నిరసనకారులను పోలీసులు అడ్డుకునే క్రమంలో తీవ్ర ఉద్రిక్తత చోటుచేసుకుంది. ఏబీవీపీ- తెరాస నాయకుల మధ్య తోపులాట జరిగింది. ఒకరిపై మరొకరు దాడులు చేసుకోగా... ఘర్షణలు అడ్డుకునేందుకు పోలీసులు లాఠీలకు పనిచెప్పారు.

ఇవీచూడండి: సీఎం కేసీఆర్‌కు కరోనా పాజిటివ్‌