రాజన్న సిరిసిల్ల జిల్లా చేనేత సెల్లాకు( టవల్స్) రాష్ట్రవ్యాప్తంగా మంచి ఆదరణ లభిస్తోంది. కరోనా వైరస్ నేపథ్యంలో ముఖానికి మాస్క్ లు కట్టుకునే పరిస్థితి రాగా అందుకు ప్రత్యామ్నాయంగా సిరిసిల్ల సెల్లా(కండువా) హాట్ టాపిక్గా మారింది. ఏకంగా రాష్ట్ర ముఖ్యమంత్రి కేసీఆర్ సైతం సిరిసిల్ల సెల్లను మెడలో వేసుకొని తెలంగాణ వ్యాప్తంగా జరిగే కార్యక్రమాల్లో పాల్గొనడం అందరి దృష్టిని ఆకర్షిస్తోంది.
25 వందల కండువాలకు సీఎం ఆర్డర్..
సిరిసిల్లలోని అనంత నగర్కు చెందిన గుంటక మల్లేశం తనయులు కోటేశ్వర్, శ్రావణ్లు గత 40 ఏళ్లుగా చేనేత వృత్తినే నమ్ముకున్నారు. ముఖ్యమంత్రి కేసీఆర్ ఇటీవల తన వస్త్రధారణలో భాగంగా వేసుకున్న కండువాలు వీరి దగ్గర నుంచి ప్రత్యేకంగా చేయించి తెప్పించుకున్నవే. ఇప్పటివరకు ముఖ్యమంత్రి కార్యాలయానికి మూడు రంగుల్లో తయారుచేసిన 3000ల టవల్స్ను వారు అందజేశారు. వీటిని చూసిన ముఖ్యమంత్రి సిరిసిల్ల సెల్లాకు ఆకర్షితులై మరో ఇరవై ఐదు వందల కండువాలకు ఆర్డర్ ఇచ్చినట్లు కోటేశ్వర్ తెలిపారు.
"30 ఏళ్లుగా చేనేత వృత్తిని చేస్తున్నాం. ఈ కరోనా సమయంలో మాస్కు వాడటం ఇబ్బందికరంగా ఉంది.. దీనికి కొంచెం టవల్ అయితే బాగుంటదని ముఖ్యమంత్రి చెప్పడం జరిగింది. అందుకే నాణ్యతో కూడిన కొన్ని నమూనాలను పాత పద్ధతైన సెల్ల రూపంలో వారికి పంపించాను. అది వారికి ఎంతో నచ్చింది. ఇంకా ఆర్డర్లు ఇస్తున్నారు."
-కోటయ్య, చేనేత వృత్తిదారుడు
మరిన్ని ఉత్పత్తులకు కృషి చేస్తాం:
కరోనా పరిస్థితుల్లో తమ వద్ద రెండు వందల మంది కార్మికులు ఉపాధి పొందుతున్నారని వారు తెలిపారు. పాత పవర్లూమ్స్ పైనే ఇలాంటి కండువాలు సుమారు 50 రకాలుగా చేయవచ్చని వెల్లడించారు. ఒకేసారి నాలుగు కండువాలు నేసే విధంగా అధునాతన యంత్రాలకు ప్రభుత్వం ఆర్థిక సాయం అందించినట్లయితే మరిన్ని నాణ్యమైన టవల్స్తో పాటు, కర్చీఫ్లు, లుంగీలు, దోతులు నాణ్యతతో కూడిన ఉత్పత్తులు మార్కెట్లోకి తీసుకురావడానికి కృషి చేస్తామన్నారు. సిరిసిల్ల నుంచి మహారాష్ట్ర, ముంబయి, దిల్లీ, పుణే లాంటి పట్టణాలకు వీటిని సరఫరా చేస్తామని మల్లేశం చెబుతున్నారు.
"కర్ఛీఫ్, దోతులు, లుంగీలు, ఇంకా చాలా రకాల ఖాదీ వస్త్రాలు తయారు చేస్తున్నాం. ప్రభుత్వం నుంచి ప్రోత్సాహకం ఉంటే ఇంకా చాల రకాలు తయారు చేసే అవకాశం ఉంటంది. మార్కెట్లో ఇలాంటి ఉత్పత్తులు ప్రవేశ పెట్టడానికి ప్రభుత్వం ఆర్థికంగా సహాయం అందించాలని కోరుతున్నాం."
-శ్రావణ్, చేనేత వృత్తిదారుడు
గరిష్ఠంగా రూ. 150 వరకు అందుబాటులో..
సిరిసిల్ల మరమగ్గాలపై 100 శాతం కాటన్తో చేసిన కండువాల కోసం రాష్ట్రవ్యాప్తంగా ఆర్డర్లు వస్తున్నాయి. లాక్ డౌన్తో మూతపడిన వస్త్ర ఉత్పత్తి పరిశ్రమకు కొంత ఊరట లభిస్తుంది. ప్రస్తుత పరిస్థితుల్లో ఆటుపోట్లను అధిగమిస్తూ విపణిలో డిమాండ్కు తగ్గట్టుగా నేత కార్మికులు కండువాలను ఉత్పత్తి చేస్తున్నారు. మూడు రకాల సైజుల్లో తయారవుతున్న ఈ కండువాలో నూలు నాణ్యతను బట్టి రూ. 55 నుంచి గరిష్ఠంగా రూ.150 వరకు అందుబాటులో ఉన్నాయి.
ఇదీ చదవండి:వలస కష్టం: మండుటెండలో గర్భిణి నడక
