'వామన్​రావు దంపతుల హత్య కేసులో విచారణ సరిగా జరగలేదు'

పెద్దపల్లి జిల్లా మంథని మండలం గుంజపడుగుకు చెందిన హైకోర్టు న్యాయవాద దంపతుల హత్య కేసులో విచారణ మాత్రం సరిగా జరగలేదని వామనరావు తండ్రి కిషన్​రావు ఆరోపిస్తున్నారు. ఈ కేసులో పుట్టమధుతో పాటు పూదరి సత్యనారాయణ హస్తం కూడా ఉన్నట్లు ఆక్షేపించారు.

న్యాయవాది వామన్​రావు దంపతులు వేసిన కేసులకు భయపడే వారిని అతికిరాతకంగా హత్య చేయించారని ఆయన తండ్రి కిషన్​రావు ఆరోపించారు. ఈ హత్యలో పుట్ట మధు దంపతులు పరోక్షంగా పాల్గొన్నారని ఆక్షేపించారు. తాను దుఃఖంలో ఉన్న సమయంలో ఫిర్యాదు తీసుకున్న రామగిరి ఎస్సై... దర్యాప్తులో నిందితులందరూ బయటపడతారని తెలిపినట్లు వెల్లడించారు. అసలైన నిందితుల పేర్లు ఇప్పటికీ చేర్చలేదన్నారు.

ఈ కేసులో విచారణ సరిగా జరగలేదని... ఏప్రిల్​ 16 న ఐజీ నాగిరెడ్డికి రెండు పేజీల లేఖను రాసినట్టు తెలిపారు. అవసరమైతే తనపై నార్కో టెస్ట్ కూడా చేయమన్నట్టు వెల్లడించారు. గ్రామ, మండల స్థాయి నుంచి హైదరాబాద్ వరకు పలువురి హస్తం ఈ హత్యలో ఉందన్నారు. ఈ హత్యలో పుట్టమధుతో పాటు, కమాన్​పూర్ మార్కెట్ ఛైర్మన్ పూదరి సత్యనారాయణ భాగస్వామ్యం కూడా ఉందని ఆరోపించారు.

ఇదీ చూడండి: ప్రేమించట్లేదని యువతిపై కత్తితో దాడి..