కడెం, స్వర్ణ జలాశయాల్లోకి వరద ఉద్ధృతి

నాలుగురోజుల నుంచి కురుస్తున్న వర్షాలతో నిర్మల్‌ జిల్లాలోని కడెం, స్వర్ణ జలాశయాల్లో వరద ఉద్ధృతి కొనసాగుతోంది.  ఇప్పటికే నిండుకుండల్లా ఉన్న జలాశయాల్లోకి మరింత నీరు వచ్చిచేరుతోంది.

వరుసగా కురుస్తున్న వానలతో నిర్మల్​ జిల్లాలోని కడెం, స్వర్ణ జలాశయాలకు జలకళ సంతరించుకుంది. కడెం జలాశయం పూర్తిస్థాయి నీటిమట్టం 700 అడుగులు కాగా ప్రస్తుతం 694.8 అడుగుల నీటిమట్టాన్ని నిలకడగా ఉంచుతూ నీటిని దిగువకు వదులుతున్నారు. ఈరోజు ఉదయం నుంచి 9 గంటల వరకు 6 గేట్లను 10 అడుగుల మేర ఎత్తి 53,800 క్యూసెక్కుల నీటిని కిందకి వదిలారు. ప్రస్తుతం 4 గేట్ల ద్వారా 39వేల క్యూసెక్కుల నీటిని దిగువకు పంపిస్తున్నారు. స్వర్ణ జలాశయంలో పూర్తిస్థాయి నీటిమట్టం 1,183కి నీరు చేరడం వల్ల రెండు గేట్లు ఎత్తి 7,500 క్యూసెక్కుల నీటిని విడుదల చేశారు.

• ఇదీ చూడండి : దేవదాస్ కనకాల పార్థివదేహానికి ప్రముఖుల నివాళి