ఉపాధ్యాయ వృత్తి అంటే బోధించడమే కాదు... విద్యార్థుల్లో సామాజిక బాధ్యత పెంపొందించి, ఉత్తమ పౌరులుగా తీర్చిదిద్దాలి అని గుర్తు చేస్తున్నారు... నారాయణపేట జిల్లా మక్తల్ మండలం లింగంపల్లి ప్రాథమిక పాఠశాల ఉపాధ్యాయులు. మొదట సొంత ఖర్చులతో పాఠశాలలోని చిన్న చిన్న సమస్యలు పరిష్కరించారు. తర్వాత దాతల సహకారంతో బడి రూపురేఖలే మార్చేశారు. ఉన్నతాధికారుల ప్రశంసలు అందుకోవడమే కాకుండా... 2018-19 సంవత్సరానికి జిల్లాలో స్వచ్ఛ పాఠశాలగా ఎంపికైంది.
గ్రామస్థుల సహకారంతో...
2018 జూన్ నెలలో ప్రధానోపాధ్యాయుడిగా బాధ్యతలు స్వీకరించిన చంద్రశేఖర్... తోటి ఉపాధ్యాయుల సహకారంతో 40 వేల రూపాయలు పోగుచేసి పాఠశాల భవనానికి రంగులు వేయించి, విద్యార్థులు స్ఫూర్తి పొందేలా నీతి వాక్యాలు రాయించారు. తర్వాత గ్రామస్థులతో సమావేశం నిర్వహించి పాఠశాలలో సమస్యలు పరిష్కరించేందుకు చేయూతనివ్వాలని కోరారు. పూర్వ విద్యార్థుల చొరవతో కేవలం ఇరవై రోజుల్లో 3లక్షల రూపాయలు జమయ్యాయి. ఈ నిధులతో మరుగుదొడ్లకు మరమ్మతులు, తాగునీటి సౌకర్యం, గ్రంథాలయం గది, ప్రతి తరగతి గదిలో ఫ్యాను, సభావేదిక, తడి, పొడి చెత్త వేరు చేసేందుకు కుండీలు ఏర్పాటు చేశారు.
అన్నింట ఆదర్శం
పాఠశాల ఆవరణలో 150 మొక్కలు నాటి హరితవనంగా మార్చారు. చుట్టుపక్కల కూడా పచ్చగా ఉండాలనే సామాజిక సృహాతో... పాఠశాల పక్కనే ఉన్న వెయ్యి గజాల స్థలం అన్యాక్రాంతం కాకుండా చదును చేసి, కంచె వేసి మొక్కలు నాటారు. ఈ పాఠశాలలో ఆట పాట, కృత్యాధార వంటి వినూత్న పద్ధతుల్లో బోధిస్తున్నారు. ప్రతినెలా చిత్రలేఖనం, క్విజ్ పోటీలు నిర్వహించి... విజేతలకు బహుమతులు అందజేస్తున్నారు. నాణ్యమైన భోజనం అందిస్తూ ఉన్నతాధికారులతో ప్రశంసలు అందుకుంటున్నారు.
ఉపాధ్యాయుల కృషితో చుట్టుపక్కల గ్రామాల విద్యార్థులు కూడా ప్రైవేటు పాఠశాలలను కాదని ఇక్కడ చేరేందుకు ఆసక్తి చూపుతున్నారని గ్రామస్థులు హర్షం వ్యక్తం చేస్తున్నారు.
ఇదీ చూడండి: 'రాజకీయాలను తెరాస, భాజపాలు రక్తికట్టిస్తున్నాయి'
