కొవిడ్ నియంత్రణ, ధాన్యం సేకరణలో ఏవైనా సమస్యలు తలెత్తితే.. ఆయా ఎమ్మెల్యేలకు తెలియజేయాలని మంత్రి శ్రీనివాస్ గౌడ్ సూచించారు. నారాయణపేట కలెక్టరేట్లో ఎంపీ మన్నే శ్రీనివాస్ రెడ్డితో కలిసి.. మహమ్మారి కట్టడి, ధాన్యం కొనుగోలుపై జిల్లా అధికారులతో సమీక్ష సమావేశం నిర్వహించారు. అన్ని ప్రభుత్వాసుపత్రుల్లో అవసరమైన మేర రెమ్డెసివర్ మందులతో పాటు అన్ని సౌకర్యాలు సిద్ధంగా ఉన్నాయంటూ.. ప్రజలు భయాందోళన పడాల్సిన అవసరం లేదని వివరించారు.
గ్రామీణ ప్రాంతాల్లో ఫీవర్ సర్వేను పక్కగా నిర్వహించి.. లక్షణాలున్న వారికి వెంటనే వైద్యం ప్రారంభించాలని మంత్రి అధికారులకు సూచించారు. అవసరాలను బట్టి ఐసోలేషన్ కేంద్రాలను ఏర్పాటు చేసుకోవాలన్నారు. పాజిటివ్ కేసులను పీహెచ్సీల వారిగా విభజన చేసుకొని.. మధ్యాహ్నం తర్వాత గ్రామాల్లో తిరుగుతూ బాధితులతో మాట్లాడాలని డాక్టర్లను కోరారు. పంచాయతీ సెక్రెటరీ నుంచి ఏఎన్ఎం, ఆంగన్వాడీ, డాక్టర్లంతా ఒక టీమ్గా పని చేయాలని విజ్ఞప్తి చేశారు.
రాష్ట్ర వ్యాప్తంగా ఈసారి అనుకున్న దానికంటే నాలుగు రెట్లు అధికంగా పంట దిగుబడి వచ్చిందని మంత్రి గుర్తు చేశారు. అందుకు తగ్గట్టుగా కొనుగోలు కేంద్రాల్లో ధాన్యం సేకరణకు అన్ని ఏర్పాట్లు చేయాలని అధికారులను ఆదేశించారు. కొత్తగా రైస్ మిల్లులను ఏర్పాటు చేద్దామనుకునే వారిని ప్రోత్సహించాలన్నారు.
ఈ కార్యక్రమంలో అదనపు కలెక్టర్ చంద్రా రెడ్డి, ఎస్పీ చేతన, వైద్యారోగ్య శాఖ అధికారి శైలజ, వ్యవసాయ అధికారి జాన్ సుధాకర్, ఎమ్మెల్యేలు రాజేందర్ రెడ్డి, చిట్టెం రామ్మోహన్ రెడ్డి, పట్నం నరేందర్ రెడ్డి, తదితరులు పాల్గొన్నారు.
ఇదీ చదవండి: 'ప్రాథమిక దశలో గుర్తిస్తే.. బ్లాక్ ఫంగస్ నుంచి కోలుకోవచ్చు'
