నల్గొండ జిల్లా చిట్యాల మండలం నేరడ గ్రామంలో మాయరోగంతో మంచానికే పరిమితమైన ఓ బాధితుడికి సాంత్వన లభించింది. ఇంటికి పెద్ద దిక్కుగా ఉండాల్సిన వ్యక్తి.. మంచానికే పరిమితమైన వైనంపై గతేడాది సెప్టెంబర్ 11న ఈటీవీ భారత్ ప్రసారం చేసిన కండర క్షీణత వ్యాధి.. కుటుంబాన్ని కాటేసింది! కథనానికి స్పందన లభించింది. సినీ పెద్దలు.. నిర్మాత చదలవాడ శ్రీనివాసరావు, దర్శకుడు కె.అజయ్ కుమార్లు బాధితుడికి లక్ష రూపాయల ఆర్థిక సాయం అందించారు.
2020 సెప్టెంబరులో ఈటీవీ భారత్ కథనం..
నేరడకు చెందిన జంపాల గోపాల్.. మస్కులర్ డిస్ట్రోఫీ బారిన పడి మంచానికే పరిమితమయ్యాడు. కాళ్లు, చేతులు ఆడని దుర్భర స్థితికి చేరుకున్నాడు. చికిత్స కోసం రూ. 8 లక్షలు ఖర్చు చేసి.. ఎన్ని దవాఖానాలు తిరిగినా ఫలితం దక్కలేదు. ఉన్న డబ్బంతా ఖర్చయిపోగా.. వైద్యాన్ని నిలిపివేశారు. ఆ కొద్ది రోజులకే.. మూత్ర పిండాల వ్యాధితో గోపాల్ తండ్రి కన్ను మూశాడు. ఇద్దరు పిల్లలతో పుట్టింట్లోనే ఉంటున్న చెల్లెలితో కుటుంబ పరిస్థితి మరింత భారమైంది. వారి దీనగాథపై 2020 సెప్టెంబరులో.. ఈటీవీ భారత్ కథనం ప్రసారం చేసింది.
పెద్ద మనసున్న సినీ పెద్దలు..
విషయం తెలుసుకున్న బిచ్చగాడు చిత్ర నిర్మాత చదలవాడ శ్రీనివాసరావు, మాతృదేవోభవ చిత్ర దర్శకుడు కె.అజయ్ కుమార్ ఈటీవీ భారత్ ప్రతినిధితో కలిసి బాధితుడి ఇంటికి స్వయంగా వెళ్లారు. వారికి రూ. లక్షను ఆర్థిక సాయంగా అందించారు. ఉన్నత స్థాయిలో ఉన్న వ్యక్తులు నిరుపేద ఇంటికి రావడంతో.. గోపాల్తో పాటు ఆయన కుటుంబ సభ్యులకు కన్నీళ్లు ఆగలేదు. పెద్ద మనసుతో.. ఆపదలో ఉన్న తమను ఆదుకునేందుకు వచ్చిన వారికి కృతజ్ఞతలు తెలుపుతూ.. బాధితుడు ఆనందంతో పొంగిపోయాడు.
వీల్ ఛైర్ కొంటాను..
ఈటీవీ భారత్ కథనం ప్రసారమైనప్పటి నుంచి బాధితులకు దాతల నుంచి రూ. లక్షా 60 వేలు అందగా.. ప్రస్తుతం అందిన డబ్బుతో 'పవర్ వీల్ ఛైర్' కొనుక్కుంటానని గోపాల్ చెబుతున్నాడు. బాధితులు, దాతలు ఈటీవీ భారత్కు ధన్యవాదాలు తెలియజేశారు.
సంబంధిత కథనం: కండర క్షీణత వ్యాధి.. కుటుంబాన్ని కాటేసింది!
