కృష్ణా బేసిన్‌లో అతిపెద్ద ప్రాజెక్టుగా ఉన్న నాగార్జునసాగర్‌ నిర్వహణపై అధికారులు ఉదాసీనంగా వ్యవహరిస్తున్నారనే ఆరోపణలు వినిపిస్తున్నాయి. 2009లో కృష్ణాకు వచ్చిన భారీవరదలకు జలాశయం స్పిల్‌వేకు భారీగా గుంతలుపడ్డాయి. తాత్కాలిక మరమ్మతులతో అధికారులు చేతులు దులుపుకున్నారు. అప్పటినుంచి అనేక సార్లు వరదలు వచ్చి క్రస్ట్ గేట్లు ఎత్తినపుడల్లా లక్షల క్యూసెక్కుల వరద నీటి విడుదలతో మళ్లీ స్పిల్‌వే దెబ్బతింది. ఎగువన కృష్ణా ప్రాజెక్టులకు వరద రాక మొదలైంది. స్పిల్ వేకు మరమ్మతుల్లో జాప్యం వల్ల ఈసారి వరదలకు తట్టుకుంటుందా అనే సందేహాలు.... నీటిపారుదల ఇంజినీర్ల నుంచే వ్యక్తమవుతోంది. స్పిల్‌వే నిర్వహణకు 40 కోట్లు అంచనా వేసి ప్రతిపాదనలు పంపారు. ప్రభుత్వం సకాలంలో నిధులు విడుదల చేయకపోవడం వల్ల పనులు ముందుకు సాగడం లేదు. గతంలో నాసిరకంగా చేసిన పనుల వల్ల స్పిల్‌వే పటిష్ఠతపై నీలిమేఘాలు కమ్ముకున్నాయి.
స్పిల్వేపై భారీ గుంతలు
గతేడాది కుడి కాల్వ ప్రధాన గేటు విరిగిపోగా ఇటీవలే కొత్తది అమర్చారు. ప్రాజెక్టు క్రస్ట్‌గేట్లు తక్షణం మార్చాలని విశ్రాంత ఇంజినీర్లు సూచిస్తున్నారు. వార్షిక నిర్వహణలో భాగంగా క్రస్ట్ గేట్లకు రబ్బరింగ్, గ్రీజు ఇతర పనులు మాత్రమే చేపడుతున్నారు. 12 లక్షల క్యూసెక్కుల వరదని తట్టుకునే సామర్ధ్యం మాత్రమే ఉండగా.. 2009లో 25 లక్షల క్యూసెక్కుల వరద రాకతో స్పిల్వేపై భారీ గుంతలు ఏర్పడ్డాయి. పలుసార్లు మరమ్మతుల కోసం ప్రతిపాదనలు పంపినా ఫలితంలేదని ఇంజినీరింగ్ అధికారులు వాపోతున్నారు.
డిసెంబర్ నుంచి మే వరకు మాత్రమే స్పిల్‌వే పనులు చేపట్టడానికి అనుకూల సమయం. అందుకు కనీసం ఆర్నెళ్లు పడుతుందని అధికారులు అంచనావేస్తున్నారు.
ఇదీ చదవండి: WATER DISPUTES: 'పాలమూరుకు నీళ్లు వచ్చాయని సంబురపడేలోపే దోచుకెళ్తున్నారు'
