కాంగ్రెస్ అనేక ప్రాజెక్టులు కట్టి సాగు నీరు ఇచ్చిందని నాగార్జునసాగర్ కాంగ్రెస్ అభ్యర్థి జానా రెడ్డి చెప్పారు. నల్గొండ జిల్లా హాలియాలో జరిగిన కాంగ్రెస్ జనగర్జన సభలో పాల్గొన్నారు. తెలంగాణ అమరవీరులకు నివాళులు అర్పించారు. నాగార్జునసాగర్ ప్రాజెక్టు ద్వారా తెలంగాణలో ఆరున్నర లక్షల ఎకరాలకు నీరు అందించామని.. శ్రీశైలం ఎడమ కాలువ ద్వారా సమారు 3 లక్షల ఎకరాలకు సాగు నీరందించామన్నారు. ప్రజల ఆకాంక్షను గౌరవించి ప్రత్యేక రాష్ట్రం ఇచ్చిన కాంగ్రెస్ను గెలిపించాలన్నారు.
తెలంగాణ కోసం తమ పదవులు త్యాగం చేశామని చెప్పారు. కాంగ్రెస్ ఎన్నో పథకాలు తీసుకొచ్చిందన్నారు. ఉపాధి హామీ చట్టం, ఆహార భద్రత చట్టం, సమాచార హక్కు చట్టం తెచ్చామని తెలిపారు. ఉప ఎన్నికల ప్రచారంలో తిరుగుతున్న తెరాస ఎమ్మెల్యేలు, ఎంపీలు తెలంగాణ రాష్ట్ర రాకపోతే కనీసం సర్పంచులు కూడా కాలేకపోయేవారని చెప్పారు. కాంగ్రెస్ గుర్తుతో గెలిచి పార్టీ మారిన వారికి ప్రశ్నంచే అర్హత లేదన్నారు. తన వల్ల అనేక మందికి పదవులు వచ్చాయని వారే తనపైకి వస్తున్నారని ఆగ్రహాం వ్యక్తం చేశారు.
