రెండు పదుల వయస్సు వచ్చిందంటే నేటి యువత.. ఏదో ఒక పని చేసుకుంటూ కుటుంబానికి అండగా నిలుస్తున్నారు. నాగర్కర్నూల్ జిల్లా కల్వకుర్తి మండలం రఘుపతిపేట గ్రామానికి చెందిన నార్లకంటి జంగయ్య-రేణమ్మ దంపతులకు మాత్రం ఆ అదృష్టం దక్కలేదు. 20 ఏళ్లు దాటిన ఇద్దరు కుమారులను చంటిబిడ్డల్లా సాకాల్సిన దుస్థితి. అంతుచిక్కని వ్యాధితో ఐదేళ్ల నుంచి మంచానికై పరిమితమైన ఆ కుమారులను చూస్తూ ఆ తల్లిదండ్రులు బతుకీడిస్తున్నారు.
నాగర్కర్నూల్ జిల్లా కల్వకుర్తి మండలం రఘుపతిపేటకు చెందిన నార్లకంటి జంగయ్య, రేణమ్మ దంపతులు కల్వకుర్తి పట్టణం వాసవీనగర్లో నివాసం ఉంటున్నారు. జంగయ్య ఆర్టీసీ కండక్టర్గా పని చేస్తున్నాడు. ఈ దంపతులకు ఇద్దరు కుమారులు ఒక కుమార్తె ఉన్నారు. కుమారుల కంటే చిన్నదైన కుమార్తె వివాహం అయ్యింది.
ఐదేళ్ల వయసులో..
పుట్టిన నాటి నుంచి బాగానే ఉన్నా పెద్ద కుమారుడు కిట్టు ఐదేళ్ల వయస్సు వచ్చేసరికి కాళ్లు చేతుల్లో సత్తువను కోల్పోయి బలహీనంగా మారిపోయాడు. ఎంతో ఖర్చు చేసి, ఎన్ని ఆసుపత్రులు తిరిగినా.. ఏం జరిగిందో వైద్యులు తేల్చలేకపోయారు. పెద్దకుమారుడి దెబ్బ నుంచి కోలుకోక ముందే ఆ కుటుంబానికి మరో ఆపద వచ్చింది.
దెబ్బ మీద దెబ్బ
రెండో కుమారుడు వినయ్ కిరణ్కు ఐదేళ్లు వచ్చేసరికి అదే పరిస్థితి ఎదురైంది. వీరిద్దరిని దశాబ్ధకాలం ఆసుపత్రుల చుట్టు తిప్పినా... వ్యాధి ఏంటో తేల్చలేకపోయారు వైద్యులు. అంతుచిక్కని వ్యాధితో మంచానికే పరిమితమైన ఇద్దరు కుమారులకు 15 ఏళ్లుగా సేవలు చేస్తోంది ఆ తల్లి. ఇద్దరు కుమారులు కిట్టు(24), వినయ్ కిరణ్(20)లను కంటికి రెప్పలా చూసుకుంటున్న రేణమ్మ గడప దాటి బయటకు వెళ్లలేని పరిస్థితి.
సాయం చేయండి..
జంగయ్య ఒక్కడి సంపాదనతోనే కుటుంబాన్ని పోషించడం భారంగా మారిందని రేణమ్మ తెలిపింది. తన కుమారులను విడిచి బయటకు వెళ్లే పరిస్థితి లేనందున ఇంటి వద్దే స్వయం ఉపాధి చేపట్టేందుకు ప్రయత్నిస్తున్నానని చెప్పింది. దానికి సంబంధించి.. రుణాల కోసం బ్యాంకుల చుట్టూ తిరిగినా ప్రయోజనం లేకుండా పోయిందని, ప్రభుత్వం సహకరించి తమను ఆదుకోవాలని ఆ దంపతులు వేడుకుంటున్నారు.
- ఇదీ చూడండి : నోముల నర్సింహయ్య అంత్యక్రియలకు హాజరైన కేసీఆర్
