తహసీల్దార్ నాగరాజు అక్రమాల ఉదంతంలో... ఇద్దరు స్థిరాస్తి వ్యాపారులనూ కటకటాల్లోకి పంపిన అధికారులు.. వారిరువురిపై దర్యాప్తు ముమ్మరం చేశారు. అయితే వీరిలో అంజిరెడ్డి వ్యవహారం ఇప్పటికే బహిర్గతం కాగా.. ఇప్పటివరకు పెద్దగా వెలుగులోకి రాని శ్రీనాథ్ నేపథ్యం గురించి... అనిశా అధికారులు లోతుగా ఆరా తీస్తున్నారు. లంచం ఇచ్చిన సొమ్ములో సింహభాగం సమకూర్చింది... ఇతడే అనే ప్రాథమిక సమాచారం మేరకు ఆ సొమ్ము ఎక్కడిదని తేల్చే పనిలో అధికారులు నిమగ్నం అయ్యారు.
శ్రీనాథ్ ప్రస్థానం
ఇప్పటి వరకు సేకరించిన వివరాల మేరకు.. ములుగు జిల్లా వెంకటాపూర్ మండలం లక్ష్మీదేవిపేటకు చెందిన శ్రీనాథ్ కొన్నేళ్ల క్రితం నగరానికి వచ్చి.. అల్కాపురి కాలనీలో నివాసం ఉంటున్నాడు. ఉప్పల్ చిలకానగర్లో సత్యసాయి డెవలపర్స్ పేరుతో.... స్థిరాస్తి వ్యాపార సంస్థను ప్రారంభించాడు. కీసర ప్రాంతంలో స్థిరాస్తి వ్యాపారం పెరగడం వల్ల ఆ ప్రాంతం కేంద్రంగా కార్యకలాపాల్ని విస్తృతం చేశాడు. వివాదాస్పద భూముల వ్యవహారంలో తలదూర్చి... రెవెన్యూ, పోలీస్ అధికారుల సహకారంతో వాటిని చౌక ధరలకే సొంతం చేసుకొనే ప్రయత్నాల్ని ఆరంభించాడు. కీసరతోపాటు హయత్‌నగర్ సమీపంలోని పసుమాముల ప్రాంతాల్లో.. స్థిరాస్తి కార్యకలాపాలు సాగించాడు. ఉమ్మడి వరంగల్ జిల్లాలోనూ స్థిరాస్తి వ్యాపార కార్యకలాపాల్ని నిర్వహించాడు. అందులో భాగంగానే లింగాల ఘనపురంలోనూ భూముల్ని కొనుగోలు చేశాడు. ఈ నేపథ్యంలో కోట్ల విలువైన భూముల్ని కొనుగోలు చేయడానికి డబ్బులు ఎక్కడి నుంచి సమకూర్చాడనే కోణంలో... అనిశా వర్గాలు ఆరా తీస్తున్నాయి. స్థిరాస్తి వ్యాపార లావాదేవీలకు సంబంధించిన రికార్డుల్ని.. అత్యంత గోప్యంగా దాచి ఉంచుతాడని తెలుసుకున్న అనిశా అధికారులు... హైదరాబాద్‌తో పాటు హన్మకొండ రాంనగర్‌లోని శ్రీనాథ్ సంబంధీకుల సమాచారాన్ని రాబట్టే పనిలో నిమగ్నమయ్యారు.
వరంగల్ సంబంధాలపై ఆరా..
తహసీల్దార్ నాగరాజుకు లంచంగా ఇచ్చిన సొమ్ములో.. 90 లక్షల రూపాయలను హన్మకొండ నుంచే తీసుకొచ్చారనే సమాచారంతో.. శ్రీనాథ్‌కు ఉమ్మడి వరంగల్ జిల్లాలో గల సంబంధాలపై అనిశా దర్యాప్తు చేస్తోంది. ఓ ప్రముఖ పార్టీలో కీలకంగా వ్యవహరిస్తున్న ప్రజాప్రతినిధితో సన్నిహితంగా మెలుగుతాడనే సమాచారం సేకరించారు. ఆ ప్రజాప్రతినిధిని తరచూ హైదరాబాద్కు పిలిపించి... అతడి సమక్షంలో కీసర ప్రాంతంలోని చోటామోటా నాయకులు, ప్రజాప్రతినిధులకు విందులు ఏర్పాటు చేసి అనూకూలంగా చేసుకున్నట్లు అధికారులు అనుమానిస్తున్నారు. అలాగే వాణిజ్య కార్యకలాపాల సంస్థకు.. పలు విడతలుగా ఛైర్మన్‌గా వ్యవహరించిన ఒకరితోనూ... ఇతడికి సన్నిహిత సంబంధాలున్నట్లు గుర్తించారు.
మరో వైపు భూవ్యవహారాలకు సంబంధించి ఉమ్మడి వరంగల్ జిల్లాకు చెందిన ఓ తహసీల్దార్ సలహాల్ని పాటిస్తాడనే సమాచారం మేరకు... వీరందరి గురించి ఆరా తీస్తున్నారు. శ్రీనాథ్ సమకూర్చిన సొమ్ముతో.. వీరికేమైనా సంబంధాలున్నాయా.. అనే కోణంలో దర్యాప్తు చేస్తున్నారు. తాను కార్యకలాపాలు సాగించే ప్రాంతంలో.. రెవెన్యూ, పోలీసు అధికారులకు శ్రీనాథ్ ముందుగానే నజరానాలు ముట్టజెప్పి ప్రసన్నం చేసుకుంటాడని... స్థిరాస్తి వ్యాపార వర్గాల్లో ప్రచారం జరుగుతోంది. ఓ విశ్రాంత పోలీస్ అధికారికి చెందిన భూములను సొంతం చేసుకునే విషయంలో... తలెత్తిన వివాదమే ఇందుకు తార్కాణంగా చెబుతున్నారు. ఆ విషయంలో సదరు విశ్రాంత అధికారి పలుమార్లు ఫిర్యాదులు చేసినా.. ప్రభుత్వ యంత్రాంగాలు స్పందించకపోవడమే అందుకు కారణమని పేర్కొంటున్నారు. ఈ నేపథ్యంలో అధికారుల వ్యవహారంపై అనిశా అధికారులు కూపీ లాగుతున్నారు.
ఇదీ చూడండి: మరోసారి వరుణుడి జోరు.. నీటిలోనే పలు కాలనీలు
