Murder Attempt in Jeedimetla: ప్రస్తుత రోజుల్లో వివాహేతర సంబంధం వల్ల భార్యాభర్తల మధ్య ఎన్నో గొడవలు జరుగుతున్నాయి. భర్త వేరే మహిళతో వివాహేతర సంబంధం పెట్టుకున్నాడని తెలుసుకున్న ఓ ఇల్లాలు ఆ పని మానుకోమని చెప్పింది. అయినా భర్తలో ఎటువంటి మార్పు రాకపోవడంతో తన కుటుంబసభ్యులతో భర్తను మందలించే ప్రయత్నం చేసింది. ఈ క్రమంలో ఆ భర్త తన భార్యను కొట్టాడు. ఈ గొడవను అడ్డుకునేందుకు వెళ్లిన భార్య తరఫు బంధువుపై అతడు కత్తితో దాడి చేశాడు. దీంతో ఆ బంధువుకు తీవ్ర గాయాలయ్యాయి. స్థానికుల ద్వారా పోలీసులకు విషయం తెలియడంతో కేసు నమోదు చేశారు. ఈ ఘటన జీడిమెట్ల పీఎస్‌ పరిధిలో చోటుచేసుకుంది.
పోలీసులు తెలిపిన వివరాల ప్రకారం.. జీడిమెట్ల పోలీస్ స్టేషన్‌ పరిధిలోని వల్లభ్భాయి పటేల్ నగర్‌లో భార్యాభర్తలు నవత్ వినయ్ కుమార్, స్వప్న నివాసం ఉంటున్నారు. 2007లో వీరికి వివాహం అయింది. స్వప్న అంగన్వాడీ కేంద్రంలో హెల్పర్‌గా, వినయ్ కుమార్ స్థానికంగా ప్రైవేట్ ఉద్యోగం చేస్తూ జీవనం సాగిస్తున్నారు. 2020 సంవత్సరంలో భర్త వినయ్ షాపూర్నగర్‌లో నివాసం ఉండే మరో మహిళతో వివాహేతర సంబంధం పెట్టుకున్నాడు. ఈ విషయం తెలుసుకున్న భార్య ఆ సంబంధం మానుకోవాలని ఎన్నోసార్లు భర్తకు చెప్పింది.
అయినా ఎంతకూ అతని ప్రవర్తనలో మార్పు రాకపోవడంతో శనివారం రాత్రి ఆమె తల్లిదండ్రులు, చెల్లి, మామ రవిలు షాపూర్నగర్‌లో మరో మహిళతో సహజీవనం చేస్తున్న వినయ్ కుమార్ ఉన్న ప్రదేశానికి వెళ్లారు. అక్కడ వేరే మహిళతో ఉన్న వినయ్ కుమార్‌ను స్వప్న కుటుంబీకులు రెడ్ హ్యాండెడ్గా పట్టుకుని మందలించారు. దీంతో కోపోద్రిక్తుడైన నిందితుడు.. భార్యను తీవ్రంగా కొట్టాడు. భార్యాభర్తల గొడవను ఆపేందుకు స్వప్న బంధువు రవి ప్రయత్నించాడు. ఈ క్రమంలో వినయ్ కుమార్ చాకుతో రవిపై దాడి చేశాడు.
రవి మెడ, ఎడమ చేతికి తీవ్ర గాయాలయ్యాయి. స్థానికులు పోలీసులకు సమాచారాన్ని అందజేశారు. దీంతో పోలీసులు ఘటనా స్థలికి చేరుకుని బాధితుడిని చికిత్స నిమిత్తం షాపూర్నగర్‌లోని ఓ ప్రైవేట్ ఆసుపత్రికి తరలించారు. స్వప్న ఇచ్చిన ఫిర్యాదు మేరకు కేసు నమోదు చేసుకొని దర్యాప్తు చేస్తున్నారు.
ఇవీ చదవండి:
