వాహనదారుని అజాగ్రత్త.. ఐదేళ్ల బాలుడు మృత్యువాత..

ఇతర ప్రాంతం నుంచి పట్నానికి వలస వచ్చారు. కూలి పని చేసుకుంటూ తమ ఐదేళ్ల బాలుడితో కలిసి జీవనం సాగిస్తున్నారు. ఇంతలోనే ఆ పిల్లాడిని మృత్యువు ద్విచక్ర వాహనం రూపంలో బలి తీసుకుంది. బతుకుదెరువుకు వచ్చిన తమకు ఇక బతుకే లేదని ఆ తల్లి గుండెలవిసేలా విలపించింది. హృదయవిదారక ఈ ఘటన మేడ్చల్​ జిల్లా జవహర్​నగర్​లో జరిగింది.

మేడ్చల్​ జిల్లా జవహర్​నగర్​ పరిధిలో జరిగిన రోడ్డు ప్రమాదం ఐదేళ్ల బాలుడిని కబళించింది. రోడ్డు పక్కన నడుచుకుంటూ వెళ్తున్న హరికృష్ణపై నుంచి ద్విచక్ర వాహనం దూసుకెళ్లి... తీవ్ర గాయాలపాలయ్యాడు. స్థానికులు ఆస్పత్రికి తరలిస్తుండగా మార్గ మధ్యలోనే మృతి చెందాడు. తమకు న్యాయం చేయాలని డిమాండ్​ చేస్తూ బాలుడి బంధువులు పోలీసులను ఆశ్రయించారు. పోలీసులు నిందుతుడిని అదుపులోకి తీసుకున్నారు.

15 రోజుల క్రితమే పట్నానికి...

హరికృష్ణ తల్లిదండ్రులు 15 రోజుల క్రితమే బతుకుదెరువు కోసం కర్నూలు నుంచి నగరానికి వచ్చారు. కూలీ పని చేసుకుంటూ జీవనం సాగిస్తున్నారు. ఇంతలోనే ఈ విషాదం చోటు చేసుకుంది. తమ బిడ్డ ఇక లేడన్న నిజాన్ని తెలుసుకున్న తల్లిదండ్రులు కన్నీరు మున్నీరుగా విలపించారు.

ఇదీ చూడండి : కార్వాన్​ పేపర్​ గోదాములో అగ్ని ప్రమాదం