గులాబీ కోట, ఉద్యమాల ఖిల్లాగా ఉమ్మడి మెదక్ జిల్లా చరిత్రకెక్కింది. ఎన్నికలు ఏవైనా ఫలితాలు తెరాసకు అనుకూలంగా ఉంటాయి. అందరూ ఊహించినట్లుగానే మెదక్ పార్లమెంటరీ స్థానంలో తెరాస నేత కొత్త ప్రభాకర్రెడ్డి ఘన విజయం సాధించారు. కాంగ్రెస్ అభ్యర్థి గాలి అనిల్కుమార్పై 3లక్షలకు పైగా ఓట్ల మెజారిటీతో జయభేరీ మోగించారు. ప్రభాకర్రెడ్డి విజయం సాధించటం వల్ల గులాబీ శ్రేణులు సంబురాల్లో మునిగిపోయారు.
అప్పుడు కాంగ్రెస్.. ఇప్పుడు తెరాస..
సుధీర్ఘకాలంపాటు హస్తం పార్టీకి కంచుకోటగా ఉన్న మెదక్ స్థానాన్ని 1999లో హస్తం పార్టీ చేజార్చుకుంది. ఈ నియోజకవర్గానికి ఇప్పటి వరకు 17 సార్లు ఎన్నికలు జరగ్గా తొమ్మిదిసార్లు కాంగ్రెస్ గెలిచింది. 2004 నుంచి తెరాసకు కంచుకోటగా మారింది.
సంక్షేమమే అస్త్రం..
తెరాస అమలు చేస్తున్న సంక్షేమ, అభివృద్ధి పథకాలు, దశాబ్దాలుగా ఎన్నికల హామీలుగా మిగిలిపోయిన అక్కన్నపేట-మెదక్, మనోహరాబాద్ కొత్తపల్లి రైల్వేలైను సాధించడం వంటి వాటిని ప్రజల్లోకి తీసుకెళ్తూ ప్రభాకర్ బరిలో నిలిచి గెలుపొందారు. హరీశ్రావు కూడా ప్రభాకర్ తరఫున ప్రచారం నిర్వహించి ప్రభుత్వ పథకాలను ప్రజల్లోకి తీసుకెళ్లారు. మాజీ మంత్రి హరీశ్రావు మెదక్ పార్లమెంట్ పరిధిలోని 7 నియోజకవర్గాల్లో సమన్వయ బాధ్యతలను తన భుజస్కంధాలపై వేసుకుని పార్టీ గెలుపు కోసం కృషి చేశారు.
గులాబీ జెండాకే జై
తెలంగాణ ఉద్యమంలో కీలక పాత్ర పోషించిన గాలి అనిల్కుమార్ సుధీర్ఘ రాజకీయ అనుభవం కలిగిన నేత. గతంలో కాంగ్రెస్ ప్రభుత్వం చేపట్టిన అభివృద్ధి కార్యక్రమాలే తనను గెలిపిస్తాయని బరిలో నిలిచారు. కానీ కారు వేగానికి చతికిలపడ్డాడు. ప్రభుత్వ వ్యతిరేకత, మైనారిటీల ఓటుబ్యాంకు తనకు కలిసొస్తుందని భావించినప్పటికీ ఓటర్లు మాత్రం గులాబీ జెండాకే జై కొట్టారు.
పనిచేయని మోదీ మార్కు
న్యాయవాదిగా స్థానికంగా ఉన్న గుర్తింపుతో పాటు మోదీ మార్కు తనకు కలిసొస్తుందనే ఉద్దేశంతో బరిలోకి దిగిన భాజపా అభ్యర్థి రఘనందన్రావు ఏ మాత్రం పోటీ ఇవ్వలేకపోయారు. ప్రధాని మోదీ చరిష్మా , కేంద్ర ప్రభుత్వ సంక్షేమ పథకాలు తనకు లాభం చేకూరుస్తాయని ఆయన ఆశించినా భంగపాటు తప్పలేదు.
సార్వత్రిక ఎన్నికల ఫలితం పూర్తి ట్యాలీ కోసం ఇక్కడ క్లిక్ చేయండి
