కరోనా వ్యాప్తిని అరికట్టడానికి ప్రతి ఒక్కరూ తగు జాగ్రత్తలు తీసుకోవాలని రాష్ట్ర మహిళా కమీషన్ ఛైర్మన్ సునీతా లక్ష్మారెడ్డి, ఎమ్మెల్యే మదన్‌రెడ్డి పేర్కొన్నారు. మెదక్ జిల్లా నర్సాపూర్ ప్రాంతీయ ఆసుపత్రికి 10 లీటర్ల సామర్థ్యం గల 2 ఆక్సిజన్ కాన్సన్ట్రేటర్లు, రెడ్డిపల్లి పీహెచ్‌సీ, శివ్వంపేట పీహెచ్సీలకు ఒక్కోటి చొప్పున అందించారు.
కరోనా కట్టడికి ప్రభుత్వం ఎన్ని చర్యలు చేపట్టినా ప్రజలు వాటికి అనుగుణంగా జాగ్రత్తలు తీసుకోవాలని సునీతా లక్ష్మారెడ్డి సూచించారు. స్వీయ రక్షణతోనే వైరస్ వ్యాప్తిని అడ్డుకోగలమని స్పష్టం చేశారు. ఈ సందర్భంగా శివ్వంపేట, నర్సాపూర్ మండలాల్లో కరోనా వ్యాధితో మృతి చెందిన బాధిత కుటుంబసభ్యులను ఆమె పరామర్శించారు. అండగా ఉంటామని భరోసానిచ్చారు.
