ఆరో విడత హరితహారం కార్యక్రమానికి ప్రభుత్వం సర్వం సిద్ధం చేసింది. గురువారం.. ముఖ్యమంత్రి కేసీఆర్ మెదక్ జిల్లా నుంచి లాంఛనంగా ప్రారంభించనున్నారు. నర్సాపూర్లో అటవీ శాఖ అభివృద్ధి చేసిన అర్బన్ పార్కును ప్రారంభించి.. అందులో మొక్కను నాటనున్నారు. నర్సాపూర్ అటవీ ప్రాంతంలో చేపట్టిన పునరుజ్జీవన పనులను ముఖ్యమంత్రి పరిశీలిస్తారు. వాచ్ టవర్ ఎక్కి అడవుల అందాలను వీక్షించనున్నారు.
ముఖ్యమంత్రి పర్యటన ఏర్పాట్లను ఆర్థిక మంత్రి హరీశ్రావు.. అటవీ శాఖ ఉన్నతాధికారులు, జిల్లా అధికారులతో కలిసి పరిశీలించారు. పలు సూచనలు చేశారు. కరోనా ప్రభావంతో సీఎం కార్యక్రమాన్ని సాధారణంగా నిర్వహిస్తున్నట్లు హరీశ్ తెలిపారు. ప్రజా ప్రతినిధులను సైతం పరిమితంగా అనుమతిస్తున్నట్లు పేర్కొన్నారు. ప్రజలు, నాయకులు, కార్యకర్తలు రావొద్దని విజ్ఞప్తి చేశారు. ఎవరి ఇంటి వద్ద వారు మొక్కలు నాటి కేసీఆర్కు సంఘీభావం తెలపాలని సూచించారు. అనంతరం సీఎం పర్యటనపై అధికారులతో హరీశ్రావు సమీక్షించారు.
నర్సాపూర్ పురపాలక సంఘం ఏర్పడిన తర్వాత సీఎం మొదటిసారి పట్టణానికి వస్తుండటంతో.. పాలకవర్గం ఘన స్వాగతం పలికేందుకు సిద్ధం అవుతోంది.
