Singareni Retired Workers: పెన్షన్ పెంచాలంటూ సింగరేణి విశ్రాంత కార్మికుల ఆందోళన

దేశానికి వెలుగులు పంచుతున్న తమ జీవితాల్లో మాత్రం అంధకారం నిండుకుందని సింగరేణి కార్మికులు ఆవేదన వ్యక్తం చేశారు. తమకు పెన్షన్ పెంచాలంటూ ధర్నా నిర్వహించారు. మంచిర్యాల జిల్లా మందమర్రి జీఎం కార్యాలయం ముందు ఆందోళన చేపట్టారు.

పదవీ విరమణ పొందిన సింగరేణి కార్మికులు(Singareni Retired Workers) ఆందోళన బాట పట్టారు. తమకు ఇస్తున్న పెన్షన్ డబ్బులు పెంచాలని డిమాండ్ చేస్తూ మంచిర్యాల జిల్లా మందమర్రి జీఎం కార్యాలయం ముందు ధర్నా నిర్వహించారు. కేంద్ర, రాష్ట్ర ప్రభుత్వాలకు వ్యతిరేకంగా నినాదాలు చేస్తూ ఆందోళన చేపట్టారు.

అరకొర సౌకర్యాల మధ్య బొగ్గును ఉత్పత్తి చేసి దేశాభివృద్ధిలో భాగస్వాములైన తమను యాజమాన్యం, కార్మిక సంఘాలు(unions) పట్టించుకోవడం లేదని కార్మికులు (Singareni Retired Workers) ఆవేదన వ్యక్తం చేశారు. పెరిగిన నిత్యావసర ధరలకు అనుగుణంగా తమ పెన్షన్ పెంచాలని డిమాండ్ చేశారు. వేల రూపాయలు ఖర్చు అవుతుండగా తమకు మాత్రం వందల రూపాయల్లో పెన్షన్ ఇవ్వడం పట్ల తీవ్ర ఆగ్రహం వ్యక్తం చేశారు. ప్రభుత్వం అందించే ఆసరా పింఛన్ 2000 వేల రూపాయలు అందుతుండగా.. తమకు మాత్రం సింగరేణి యాజమాన్యం 300 నుంచి 2000 వేల రూపాయల లోపే ఇస్తుందని వాపోయారు. దిల్లీలో జరిగే జేబీసీసీఐ సమావేశంలో తమ సమస్యలు లేవనెత్తి సమస్య పరిష్కరించాలని డిమాండ్ చేస్తూ సింగరేణి అధికారులకు వినతిపత్రం అందజేశారు.

నేను కెకె2 లో పని చేశా. నాకు 260 రూపాయలు పెన్షన్ వస్తోంది. మరీ ఆ డబ్బులతో ఎలా బతకాలో తెలియడం లేదు. మమ్మల్ని ఆదుకోవాలని వేడుకుంటున్నాం. మాకు కనీసం పాలబిల్లు, నూనె పాకెట్​కు సరిపోవడం లేదు. కావున కార్మికుల కష్టాలను పట్టించుకోండి. మేము బతకలేక ఇటుకల కంపెనీల్లో పని చేయాల్సి వస్తోంది. తమకు పెన్షన్ డబ్బులు పెంచాలని సింగరేణి యాజమాన్యం, కార్మిక సంఘాల నాయకులకు విజ్ఞప్తి చేస్తున్నా. - లక్ష్మయ్య, సింగరేణి విశ్రాంత కార్మికుడు

ఈరోజు జేబీసీసీఐ సమావేశం దిల్లీలో జరుగుతోంది. ఇవాళ ఒక్కొక్కరికి 200, 250, 260 రూపాయలు పెన్షన్ ఇస్తున్నారు. అది పెన్షనేనా..దాన్ని పెన్షన్ అంటారా?. పదకొండో వేజ్ బోర్డు వస్తే డిసైడ్ కాకపోతే మేం బతికే పరిస్థితి లేదు. మాకు కనీస పెన్షన్ 15 వేల రూపాయలుగా నిర్ణయించాలని వేడుకుంటున్నాం. ప్రతి ఒక్కరికి మోకాళ్ల నొప్పులు, రకరకాల జబ్బులు ఉన్నాయి. ప్రతి యూనియన్ లీడర్ మా గురించి ఆలోచించి కనీసం పెన్షన్ వచ్చేలా కృషి చేయాలని కోరుతున్నా. మేం ధర్నాలు, రాస్తోరోకోలు చేస్తేనే మా గురించి ఆలోచిస్తారా..?- బాబురావు , సింగరేణి విశ్రాంత కార్మికుడు

43 వేల మంది సింగరేణిలో పనిచేస్తున్నారు. రిటైరైన వాళ్లకు పెన్షన్ ఇస్తున్నారు. తమకు ఇప్పటికి 1998లో నిర్ణయించిన ప్రకారం పెన్షన్ ఇస్తున్నారు. పదో వేజ్ బోర్డులో 1000 రూపాయలు ఇవ్వాలని కేవలం సంతకాలు పెట్టారు. ఇంతవరకు అది అమలు చేయలేదు. 1971లోనే 325 రూపాయలు ఫ్యామిలీ పెన్షన్ ఉంది. కేవలం 25 రూపాయలు పెంచి ప్రస్తుతం రూ.350 ఇస్తున్నారు. ఈ డబ్బులతో కనీసం నెల మొత్తం ఆయిల్ పాకెట్లు కూడా రావు. తమ పెన్షన్ పెంచాల్సిన అవసరం పోయి యూనియన్ నాయకులు కేవలం వారికి ప్రమోషన్లు కావాలని అడుగుతున్నారు. దయచేసి మా గురించి ఆలోంచాలని విజ్ఞప్తి చేస్తున్నా.- నర్సింగరావు, విశ్రాంత సింగరేణి కార్మికుడు

ఇదీ చూడండి: