ఇంట్లోంచి పారిపోయిన యువతి... ​100తో రక్షించిన పోలీసులు

డయల్ 100పై తక్షణ స్పందనతో ఓ యువతిని కాపాడారు మంచిర్యాల జిల్లా పోలీసులు. కుటుంబసభ్యులపై అలిగి ఆత్మహత్య చేసుకునేందుకు ఇంట్లోనుంచి వెళ్లిపోయిన యువతిని సకాలంలో పట్టుకుని తల్లిదండ్రుల చెంతకు చేర్చారు.

మంచిర్యాల జిల్లా దండేపల్లి మండలంలో ఓ యువతి ఇంటి నుంచి వెళ్లిపోయిందని రాత్రి 100కు ఫోన్​ వచ్చింది. వెంటనే స్పందించిన సిబ్బంది మంచిర్యాల పోలీసులకు సమాచారం అందించారు. సమాచారం అందుకున్న స్థానిక పోలీసులు యువతి కోసం చుట్టుపక్కల ప్రాంతాల్లో గాలించారు. ఆచూకి లభించక పోవడం వల్ల డీసీపీ ఉదయ్​కుమార్​ రెడ్డికి సమాచారం అందించి... ప్రధాన రహదారిపై వాహనాలు తనిఖీ చేస్తుండగా ఓ వాహనంలో యువతిని గుర్తించారు.

మంచిర్యాల పట్టణంలో ఐబీ చౌరస్తా వద్ద ఈనాడు దినపత్రిక తరలించే వాహనంలో యువతిని గుర్తించారు. ఆమెను విచారించగా కుటుంబ సభ్యులపై అలిగి ఆత్మహత్య చేసుకోవాలని ఇంట్లోంచి పారిపోయి వచ్చానని తెలిపింది. తన తండ్రి ఆస్పత్రిలో ఉన్నాడని మంచిర్యాలలో దింపమని కోరితే వాహనంలో తీసుకొచ్చారని పోలీసులు తెలిపారు. యువతి దొరకడం వల్ల అందరూ ఊపిరి పీల్చుకున్నారు. పోలీస్ సేవలను ఆపదలో ఉన్న ప్రతి ఒక్కరు ఉపయోగించుకోవాలని డీసీపీ తెలిపారు.

ఇదీ చూడండి: చెరువులో గుర్తుతెలియని మహిళ మృతదేహం