అంతర్రాష్ట్ర దొంగల అరెస్టు.. ఏపీలోనూ 45కుపైగా కేసులు

బెల్లంపల్లిలో ఇద్దరు అంతర్రాష్ట్ర దొంగలను బుధవారం పోలీసులు అరెస్టు చేశారు. నిందితులపై ఆంధ్రప్రదేశ్​లో ఒకరిపై 45, మరోకరిపై 10 కేసులు ఉన్నట్లు ఏసీపీ రహమాన్​ తెలిపారు. నిందితుల నుంచి రూ. 71 వేల 500 విలువగల బంగారు, వెండి ఆభరణాలు స్వాధీనం చేసుకున్నట్లు పేర్కొన్నారు.

మంచిర్యాల జిల్లా బెల్లంపల్లిలోని రైల్వే క్వార్టర్స్​లో ఈ నెల 27న మూడు చోరీలు చేసిన అంతర్రాష్ట్ర దొంగలను పోలీసులు అరెస్టు చేశారు. మొత్తం రూ. 71 వేల 500 విలువగల బంగారు, వెండి ఆభరణాలు చోరీకి గురయ్యాయని బెల్లంపల్లి ఏసీపీ రహమాన్​ పేర్కొన్నారు. ఆంధ్రప్రదేశ్ రాష్ట్రం నెల్లూరు జిల్లాకు చెందిన యాట నరసింహ, మచిలీపట్నం వందపాలెం గ్రామానికి చెందిన తోట కృష్ణమోహన్ దొంగతనానికి పాల్పడ్డారని తెలిపారు.

ఫిబ్రవరి 26న వీరిద్దరూ కాగజ్ నగర్​లో కూడా దొంగతనం చేసినట్లు పోలీసులు వివరించారు. కృష్ణమోహన్​పై ఏపీలోని 21 పోలీస్ స్టేషన్లలో 45 కేసులు ఉన్నట్లు స్పష్టం చేశారు. నరసింహపై 10 కేసులు ఉన్నట్లు తెలిపారు. నిందితులను అరెస్ట్ చేసి రిమాండ్​కు తరలిస్తున్నట్లు రహమాన్​ వెల్లడించారు.

ఇదీ చూడండి: అక్కడ చిక్కుకున్న విద్యార్థులను కాపాడండి: కేటీఆర్