దేశంలో అనేక మహా నగరాలు, పట్టణాలు ఎదుర్కొంటున్న నీటి కష్టాలపై కథనాలు పత్రికల్లో వస్తున్నాయి. నీరు లేకపోతే మానవ మనుగడ కష్టమని తెలిసినా జల సంరక్షణను నిర్లక్ష్యం చేస్తూనే ఉన్నాం. నీటిని నిల్వ చేసుకొనే అవకాశాలున్నా.. సద్వినియోగం చేసుకోలేకున్నాం. వర్షపు నీటిని నిల్వ చేసుకోవడానికి ప్రభుత్వం ఉచితంగా అనేక పథకాలను అమలు చేస్తోంది. మహబూబ్‌నగర్‌ జిల్లా అడ్డాకుల మండలంలోని తిమ్మాయిపల్లి 500 జనాభా ఉన్న చిన్న తండా. ఇటీవలే ఈ తండా గ్రామ పంచాయతీగా మారింది. మూడేళ్ల కిందట ఈ గ్రామంలో తవ్విన నాలుగు ఊట కుంటల పరిధిలో నేడు 80 రైతు కుటుంబాలు 200 ఎకరాల వ్యవసాయ భూమి సాగు చేసుకొంటున్నాయి. ఇదే గ్రామస్థులు సమీపంలోని మద్దిమోనిగుట్ట చుట్టూ సుమారు రెండు వేల కందకాలు తవ్వారు. గుట్టపై పడిన నీరంతా ఈ కందకాల్లో చేరి భూమిలోకి ఇంకడం వల్ల భూగర్భ జలాలు పెరుగుతున్నాయి. చుట్టూ కరవున్నా ఆ గ్రామంలో బోర్లు నీటితో కళకళలాడుతున్నాయి.
జాతీయ గ్రామీణ ఉపాధిహామీ పథకం కింద గ్రామస్థులు ఈ నీటి కుంటలను ఏర్పాటు చేసుకున్నారు. గ్రామంలో తాగు, సాగు నీటి ఇబ్బందులకు చక్కటి పరిష్కారం కనుగొన్న తిమ్మాయిపల్లి తండా నేడు సాక్షాత్తు దేశ ప్రధానమంత్రి దృష్టిని ఆకర్షించి, జాతీయస్థాయి గుర్తింపు పొందింది. ఆదివారం తన ‘మన్ కీ బాత్’లో ప్రధాన మంత్రి నరేంద్రమోదీ యావత్‌ దేశం మొత్తానికి తిమ్మాయిపల్లి గురించి వివరించారు. ఆ గ్రామ ప్రజల కృషిని ప్రశంసించారు.
‘ ' భవిష్యత్తులో నీటి కోసం యుద్ధాలు జరుగుతాయని చెబుతుంటే వింటూ ఉంటాం. ఆ నీటిని కాపాడుకోవలసిన బాధ్యత మనకు లేదా? జల సంరక్షణ ప్రతి ఒక్కరి సామాజిక బాధ్యత కాదా! ’
- నరేంద్ర మోదీ, దేశ ప్రధానమంత్రి
జాతీయ గ్రామీణ ఉపాధి హామీ పథకం ద్వారా నీటి సంరక్షణకు ఎన్నో పథకాలు ఉన్నాయి. ఊట కుంటలను నిర్మించడానికి రూ.4 లక్షల నుంచి రూ.20 లక్షల వరకు ఖర్చు అవుతుంది. నీటికుంటల నిర్మాణానికి రూ.60 వేల నుంచి రూ.1.20 లక్షల వరకు, చెక్‌డ్యాంలను నిర్మించడానికి రూ.2 లక్షల నుంచి రూ.4 లక్షల వరకు ఖర్చు అవుతుంది. వీటిని ఉపాధిహామీ పథకం కింద ఉచితంగా నిర్మిస్తారు.
భవిష్యత్తు అవసరాల దృష్ట్యా
జాతీయ గ్రామీణ ఉపాధిహామీ పథకం ద్వారా వర్షపునీటిని నిల్వ చేయడానికి చర్యలు తీసుకొంటున్నాం. గత వేసవికాలం నుంచే ఈ పనులను మొదలుపెట్టాం. కూలీలకు కొంత ఇబ్బంది ఉన్నా భవిష్యత్తు అవసరాల దృష్ట్యా పూర్తిగా దృష్టి సారిస్తున్నాం’ - డీఆర్‌డీవో విక్రంరెడ్డి
ఒక్కరి చొరవతో పది మందికి ఉపాధి
మా నాన్న లచ్చనాయక్‌ ధైర్యంగా ముందుకు వచ్చి మాకున్న పొలంలో రెండెకరాలు కేటాయించి ఉపాధి హామీ కింద ఊటకుంట నిర్మించారు. భూగర్భ జలాలు పెరిగి బోరులో పుష్కలంగా నీరు వస్తోంది. బీడువారిన తొమ్మిది ఎకరాలను సాగు చేసుకొంటున్నాం. - గోపాల్‌నాయక్‌, తిమ్మాయపల్లి తండా
వలసలకు అడ్డుకట్ట
మా గ్రామంలో జాతీయ గ్రామీణ ఉపాధి హమీ పథకం కింద 2016 లో నాలుగు ఊటకుంటలు నిర్మించాక భూగర్భ జల మట్టం పెరిగింది. పాడుబడిన బోర్లు సైతం నీరందిస్తున్నాయి. గతంలో ముంబయి, పుణె, హైదరాబాద్ వంటి ప్రాంతాలకు వలస వెళ్లిన వారంతా గ్రామానికి తిరిగివచ్చి వ్యవసాయం చేసుకొంటున్నారు.
- పెంటు నాయక్‌
- ఇవీ చూడండి: 'రౌడీ నేత'లకు మోదీ తీవ్ర హెచ్చరికలు
