WiFiతో ATM ఖాళీ చేశారు.. కానీ ఫాస్ట్​ట్యాగ్​ దగ్గరే దొరికిపోయారు​

ATMs theft case Details in Mahabubnagar: సాంకేతికతను ఉపయోగించుకొని ప్రపంచాన్ని జయించిన వారు కొందరుంటే.. అదే సాంకేతికతను ఉపయోగించుకొని నేరాల బాటపడుతున్నవారు మరికొందరు. అలాంటి వారే మహబూబ్​నగర్​లో ఏటీఎం చోరీలో పట్టుబడ్డ ఈ నిందితులు. కనీసం బ్యాంక్​ అధికారులకు కూడా ఎటువంటి అనుమానం రాకుండా ఏటీఎం పాస్​వర్డ్​ తెలుసుకొని నగదు నింపిన కొద్ది నిమిషాల్లోనే ఏటీఎంలను ఖాళీ చేస్తున్న ఈ ముఠాలో అందరూ ఉన్నత చదువులు చదివిన వారే. ఇంత తెలివిగా దొంగతనాలు చేస్తున్న వీరిని చివరికి ఫాస్ట్​ ట్యాగ్​ ఎలా పట్టించిందో మీరే చదవండి.

ATMs theft case Details in Mahabubnagar: ఏటీఎంలో నగదు నింపిన కొన్నినిమిషాల్లోనే డబ్బంతా దోచుకెళ్తున్న అంతరాష్ట్ర దొంగల ముఠాను పోలీసులు అరెస్టు చేశారు. మహబూబ్​నగర్ జిల్లా రాజాపూర్ మండల కేంద్రంలోని టాటా ఇండిక్యాష్ ఏటీఎం చోరీ కేసును సవాల్‌గా తీసుకున్న పోలీసులు ఎట్టకేలకు ఛేదించారు. ఈనెల 10న రాజాపూర్‌లోని టాటా ఇండిక్యాష్ ఏటీఏంలోని డబ్బు దొంగతనానికి గురైందని ఫిర్యాదు అందడంతో పోలీసులు విచారణ చేపట్టారు. దీంతో సీసీటీవీ, టోల్ గేట్ పుటేజీ, ఇతర ఆధారాలు సేకరించి ఓ ఫాస్ట్ ట్యాగ్ ఆధారంగా అసలు దొంగలెవరో కనిపెట్టారు.

సీసీటీవీలో రికార్డ్ అయిన కారు.. ఫాస్ట్​ ట్యాగ్​లో దొంగతనం జరిగిన ప్రాంతంలో తరచూ కనిపించడంతో ఆ కారుపై నిఘా ఉంచారు. మరో ఏటీఎం వద్ద చోరీకి ప్లాన్ చేసుకొని వచ్చిన ముఠా.. వెయిట్ చేస్తోంది. అదే సమయంలో అక్కడకు వచ్చిన పోలీసులు ఏటీఎం ముందు అనుమానాస్పదంగా కనిపించిన ఫార్చునర్​ను తనిఖీ చేశారు. అనంతరం అందులోని వారిని అదుపులోకి తీసుకున్నారు. విచారించగా వారే ఏటీఎంలో నగదు చోరీ చేసినట్లు ఒప్పుకున్నారని జిల్లా ఎస్పీ నర్సింహా వెల్లడించారు. నిందితులకు ఏటీఎంలో నగదు నింపడం, మరమ్మతులు చేయడం, నిర్వహణలో అనుభవం ఉందని ఎస్పీ వివరించారు. ఈ గ్యాంగ్​పై పంజాబ్, రాజస్థాన్, చండీగఢ్, ఉత్తరాఖండ్ రాష్ట్రాల్లో కేసులున్నాయని తెలిపారు. వారి నుంచి రూ.5వేల నగదు, ఫార్చునర్ వాహనం, 2 సెల్ ఫోన్లు స్వాధీనం చేసుకున్నారు.

"ఈనెల 10న రాజాపూర్​లోని టాటా ఇండిక్యాష్ ఏటీఏంలోని డబ్బు చోరీకి గురైంది. దీనిపై 16న మాకు ఫిర్యాదు అందింది. సీసీటీవీలు, టోల్ గేట్ పుటేజీలు, ఇతర ఆధారాలు సేకరించి ఓ ఫాస్ట్ ట్యాగ్ ఆధారంగా అసలు దొంగలెవరో కనిపెట్టాం. నిందితులంతా పంజాబ్ రాష్ట్రం భటిండా జిల్లాకు చెందిన వాళ్లు. వీరిలో గుర్ గగన్ సింగ్ బీసీఏ చదివాడు. ఏటీఎంలో నగదు నింపడం, మరమ్మతులు చేయడం, నిర్వహణలో అనుభవం ఉంది. ఈ అనుభవాన్ని చోరీలు చేసేందుకు వినియోగించారు. నిందితులు ముందుగా మాన్యువల్ పాస్ వర్డ్​తో నగదు నింపే ఏటీఎంలను ఎంపిక చేసుకుంటారు. ఏటీఎంకు వైఫైతో నడిచే సీసీ కెమెరాను అమర్చుతారు. ఏజెన్సీ నగదు నింపేటప్పుడు ఎంటర్ చేసే పాస్ వర్డ్​ను సీసీ కెమెరా ద్వారా చూసి నోట్ చేసుకుంటారు. నగదు నింపిన వాహనం వెళ్లిపోగానే వెంటనే అక్కడకు చేరుకుని అదే పాస్ వర్డ్​ను ఎంటర్ చేసి ఏటీఎంను ఖాళీ చేస్తారు. అలా సంగారెడ్డి, నల్గొండ జిల్లా చిట్యాల ఏటీఎంలను సైతం దోచుకున్నారు. వీరిపై పంజాబ్, రాజస్థాన్​, ఛండీగడ్, ఉత్తరాఖండ్ రాష్ట్రాల్లో కేసులున్నాయి. నలుగురు నిందితుల్లో గురుగగన్ సింగ్, భూపేందర్ సింగ్​ను అరెస్ట్​ చేయగా రష్​పాల్, సందీప్ సింగ్ పరారీలో ఉన్నారు. వారి నుంచి రూ. 5వేల నగదు, ఫార్చునర్ వాహనం, 2 సెల్ ఫోన్లు స్వాధీనం చేసుకున్నాం.-నర్సింహా, మహబూబ్​నగర్ ఎస్పీ

ఇవీ చదవండి: