KTR Mahbubanagar Tour : పాలమూరుకు తలమానికం కానున్న ఐటీ కారిడార్లో తొలి సంస్థను పురపాలక, ఐటీ శాఖల మంత్రి తారక రామారావు ప్రారంభించారు. దివిటిపల్లిలోని ఐటీ కారిడార్లో నూతనంగా నిర్మించిన ఈ ఐటీ టవర్ను మంత్రి శ్రీనివాస్ గౌడ్‌తో కలిసి ప్రారంభించిన కేటీఆర్.. అక్కడే 262 ఎకరాల్లో ఏర్పాటు చేయనున్న అమరరాజా గిగా కారిడార్‌కు శంకుస్థాపన చేసి, భూమిపూజ చేశారు. 262 ఎకరాల్లో ఏర్పాటు చేయనున్న ఈ గిగా కారిడార్ ప్రారంభోత్సవంలో అమర్ రాజా ఛైర్మన్, ఎంపీ గల్లా జయదేవ్‌తో పాటు సంస్థ వ్యవస్థాపకుడు గల్లా రామచంద్ర నాయుడు, గల్లా అరుణ కుమారితో కలిసి కేటీఆర్ భూమి పూజ చేశారు.
Amararaja Battery Company in Mahabubnagar: ఐటీ కారిడార్లో నిర్మించిన రోడ్లను ప్రారంభించి.. పరిశ్రమల ఏర్పాట్లు, వాటికి కల్పిస్తున్న మౌలిక వసతుల కల్పనను కేటీఆర్ పరిశీలించారు. అమరరాజా కంపెనీలో లిథియంతో బ్యాటరీలు ఉత్పత్తి చేస్తారని, దీంతో పర్యావరణానికి ఎలాంటి నష్టం వాటిల్లదని ఆయన తెలిపారు. పదేళ్లలో అమరరాజా రూ.9 వేల 500 కోట్ల పెట్టుబడి పెట్టనుందని వెల్లడించారు. ఈ ఐటీ కారిడార్‌కు త్వరలోనే మరిన్ని సంస్థలు వస్తాయని కేటీఆర్ ఆశాభావం వ్యక్తం చేశారు.
"మహూబూబ్నగర్లో తప్పకుండా ఇంకా పదుల సంఖ్యలో పరిశ్రమలు తరలి వస్తాయనే విశ్వాసం నాకుంది. మేము ఎంతో కష్టపడి ఈరోజు ఇతర రాష్ట్రాలతో, ఇతర దేశాలతో పోటీ పడి వారిని ఒప్పించి, మెప్పించి పరిశ్రమలను తెస్తున్నాం. బ్యాటరీ పరిశ్రమ కాబట్టి ఇక్కడ కాలుష్యం వస్తుందని కొంతమంది మాట్లాడుతున్నారు. ఇక్కడ పెట్టబోతుంది లెడ్ ఆసిడ్ బ్యాటరీ ప్లాంట్ కాదు. ఇక్కడ లిథియం అయాన్ బ్యాటరీ మేకింగ్." - కేటీఆర్, రాష్ట్ర ఐటీ, పరిశ్రమల శాఖ మంత్రి
People will get Employment Opportunities Indirectly: అమరరాజా యూనిట్ రావ‌డం వ‌ల్ల ప్రత్యక్షంగా, ప‌రోక్షంగా 10 వేల మందికి ఉపాధి అవకాశాలు లభిస్తాయని అమర్‌రాజా సంస్థ ఛైర్మన్ గల్లా జయదేవ్‌ తెలిపారు. దశల వారీగా ప్లాంట్‌ను విస్తరిస్తామని వివరించారు. కాలుష్య రహిత ఉత్పత్తితో పాటు ఈ ప్రాంత అభివృద్ధికి దోహద పడుతుందన్నారు. తెలంగాణ ప్రభుత్వం కల్పించిన మౌలిక వసతులు అద్భుతంగా ఉన్నాయని సంస్థ వ్యవస్థాపకులు గల్లా రామచంద్ర నాయుడు హర్షం వ్యక్తం చేశారు. స్థానికులకే ఉపాధి అవకాశాలు కల్పిస్తామని హామీ ఇచ్చారు. అమరరాజా సంస్థ ఇప్పటి వరకు ఉన్నదాని కంటే మిన్నగా ఈ ఒక్క ప్లాంట్‌లోనే రెట్టింపు పెట్టుబడి పెట్టనుందని ప్రభుత్వవర్గాలు వెల్లడించాయి.
"రెండు, మూడు దశల్లో ఈ ప్లాంట్‌లో బ్యాటరీల ఉత్పత్తి మొదలవనుంది. తొలి విడతలో రూ.1500 నుంచి రూ.1700 కోట్ల పెట్టుబడితో 2 గిగావాట్ల సామర్థ్యంతో ఏప్రిల్‌ 2026లో తయారీ ప్రారంభిస్తాం. రూ.250 కోట్లతో ఆవిష్కరణల కేంద్రం ఏర్పాటు చేయబోతున్నాం. మార్కెట్‌లో డిమాండ్‌ను బట్టి ప్లాంట్‌ను దశలవారీగా విస్తరిస్తాం. ప్రతి దశలో దాదాపు రూ.2500 కోట్ల పెట్టుబడి పెట్టనున్నాం."- గల్లా రామచంద్రనాయుడు, అమరరాజా వ్యవస్థాపకులు
ఇవీ చదవండి:
