ఎడతెరిపి లేని వర్షాలు.. నీటిమునిగిన పంటపొలాలు...

బంగాళాఖాతంలో ఏర్పడిన అల్పపీడనం ప్రభావంతో మహబూబాబాద్​ జిల్లావ్యాప్తంగా బుధవారం రాత్రి నుంచి గురువారం ఉదయం వరకు ఎడతెరిపిలేకుండా వర్షం కురిసింది. ఈ భారీ వర్షానికి మున్నేరు, పాకాల వాగులు పొంగి అలుగు పారుతుండటం వల్ల పలు గ్రామాల మధ్య రాకపోకలు నిలిచిపోయాయి.

మహబూబాబాద్​ జిల్లాలో ఎడతెరిపిలేకుండా కురిసిన వర్షానికి మున్నేరు, పాకాల వాగులు అలుగు పారుతున్నాయి, చెరువులన్నీ మత్తడి పోస్తున్నాయి కల్వర్టులపై నుంచి నీరు ప్రవహించడం వల్ల నెల్లికుదురు మండలం చిన్న నాగారం, ఇనుగుర్తి గ్రామాల మధ్య రాకపోకలు నిలిచిపోయాయి. ఈ వరద ప్రవాహంలో రెండు పశువులు కొట్టుకుపోయాయి.

గూడూరు మండల కేంద్రం నుంచి కమల్​తండాకు ద్విచక్రవాహనంపై వెళ్తున్న వ్యక్తి ప్రవాహ ధాటికి నీటిలో పడిపోయాడు. కేసముద్రం మండలం పెసరబండ పాఠశాల ఆవరణ మొత్తం నీటితో నిండిపోయి చెరువును తలపించింది. జిల్లాలోని పలు గ్రామాల్లో పంట పొలాలు నీట మునిగాయి. ఈ వర్షాలకు పత్తి, వరి పంటలు దెబ్బతింటాయని రైతులు ఆందోళన వ్యక్తం చేస్తున్నారు.

• ఇవీ చూడండి: వైద్యారోగ్య శాఖలో ఖాళీలను భర్తీ చేయండి: భట్టి