చేతులు లేకపోతేనేం.. సామాజిక బాధ్యతగా కాళ్లతోనే మొక్కలు నాటాడు.!

శరీరంలో అన్ని అవయవాలు సరిగా ఉంటేనే.. కొందరికి తమ పనులు తాము చేసుకోవడానికి బద్ధకం. కానీ జాకీర్​ పాషా మాత్రం అలా కాదు. పుట్టుకతోనే రెండు చేతులు లేకపోయినా నిరుత్సాహపడలేదు. సంకల్ప బలంతో ముందుకు సాగారు. పలు సామాజిక కార్యక్రమాల్లో పాలుపంచుకుంటూ ముందుకు సాగారు. తన ఇంటిముందు తానే స్వయంగా గుంత తీసి మొక్క నాటి నీళ్లు పోశారు.

కుమురం భీం ఆసిఫాబాద్​ జిల్లా కాగజ్​నగర్​కు చెందిన జాకీర్​ పాషాకు పుట్టుకతోనే రెండు చేతులు లేవు. అయినా నిరుత్సాహపడకుండా తన పనులు తానే స్వయంగా చేసుకుంటారు. సామాజిక కార్యక్రమాల్లో ముందుంటారు. హరిత హారంలో భాగంగా కాళ్లతో మొక్కలు నాటి పలువురికి ఆదర్శంగా నిలుస్తున్నారు జాకీర్​.

ఈ కార్యక్రమంలో భాగంగా తన ఇంటి ముందు.. కాళ్లతోనే గొయ్యి తీసి మొక్కలు నాటి నీళ్లు పోశారు. పర్యావరణ సమతుల్యతను పరిరక్షించాలంటే ప్రతి ఒక్కరూ మొక్కలు నాటాలని జాకీర్​ చెబుతున్నారు. మానవాళి మనుగడకు ప్రకృతిని పెంపొందించడం చాలా అవసరమని పేర్కొన్నారు.

కాళ్లతో ఓటేసి

గతంలోనూ సామాజిక బాధ్యతగా ప్రజాస్వామ్యాన్ని బతికించడంలో తనవంతు పాత్ర పోషించారు జాకీర్ పాషా. గతేడాది జరిగిన మున్సిపల్​ ఎన్నికల్లో జాకీర్​ కాలితో ఓటు వేశాడు. తన రెండు కాళ్లను ఉపయోగిస్తూ అన్ని పనులు చేసుకునే జాకీర్​.. ఓటు హక్కును కూడా అంతే బాధ్యతగా వినియోగించుకున్నారు.

ఇదీ చదవండి: HYD RAINS: హైదరాబాద్​లో భారీ వర్షం... స్తంభించిన జనజీవనం