ఆదివాసుల ఆపన్న హస్తం రాబిన్​హుడ్​ స్వచ్ఛంద సంస్థ

మారుమూల అటవీప్రాంతాల్లో నివసించే ఆదివాసీలకు ఎలాంటి సౌకర్యాలు ఉండవు. కనీస మౌలిక వసతులకు ఆమడదూరంలో ఉంటారు. అలాంటి వారి కోసం పోలీసులు మీకోసం కార్యక్రమంలో భాగంగా రాబిన్​హుడ్​ స్వచ్ఛంద సంస్థ సహకారంతో సైకిళ్లను పంపిణీ చేశారు. కుమురంభీం ఆసిఫాబాద్ జిల్లా గొవేన పంచాయతీ పరిధిలోని కుర్సిగూడెం ఆదివాసులకు అండగా నిలుస్తున్నారు.

కుమురం భీం ఆసిఫాబాద్​ జిల్లా తిర్యాణి మండలం గోవేన పంచాయతీ పరిధిలోని కుర్సిగూడెం కొలాం ఆదివాసులకు పోలీసులు సైకిళ్లు అందజేశారు. పోలీసులు మీకోసం కార్యక్రమంలో భాగంగా హైదరాబాద్​కు చెందిన రాబిన్​హుడ్​ స్వచ్ఛంద సంస్థ సహకారంతో ఏఎస్పీ వైవీ సుధీంద్ర చేతుల మీదుగా సైకిళ్లు పంపిణీ చేశారు. అత్యంత ఎత్తులో గుట్టపై ఉండి సరైన రహదారి సౌకర్యం లేని గిరిజనుల సమస్యల పరిష్కారానికి కృషి చేస్తామని ఏఎస్పీ తెలిపారు.

ఇటీవలే సోలార్ విద్యుత్​ వెలుగులు

ఇటీవలే విద్యుత్ సౌకర్యం కోసం సోలార్ విద్యుత్ దీపాలు అందించామని ఆసిఫాబాద్​ ఏఎస్పీ వైవీ సుధీంద్ర తెలిపారు. చుట్టుపక్కల వారికి ఏ అవసరం ఉన్నా వెళ్లేందుకు వీలుగా 5 సైకిళ్లు అందజేస్తున్నట్లు ఆయన వెల్లడించారు. అనారోగ్య సమస్యలు, అత్యవసర పనుల కోసం వెళ్లేందుకు సైకిళ్లు అందించాలని తిర్యాణి ఎస్సై రామారావు ఉన్నతాధికారుల దృష్టికి తెచ్చారని పేర్కొన్నారు.

పోలీసుల ప్రత్యేక దృష్టి

కుర్సిగూడెం గ్రామముపై పోలీసులు ప్రత్యేక శ్రద్ధ చూపిస్తున్నారని... ఆత్యవసరాల కోసం ఈ సైకిళ్లను గ్రామస్తులందరూ ఉపయోగించుకోవాలని సూచించారు. గ్రామస్తులు అసాంఘిక శక్తులకు అడ్డుకట్ట వేసి అభివృద్ధి సాధించాలని కోరారు. ఈ కార్యక్రమంలో ఆసిఫాబాద్ డీఎస్పీ ఆచ్చేశ్వర్ రావు, రెబ్బెన సీఐ సతీశ్ కుమార్, తిర్యాణి ఎస్సై రామారావు, రాబిన్ హుడ్ ఆర్మీ ప్రతినిధులు రాం కుమార్, దామోదర్, కుర్సిగూడెం పటేల్​ టేకం జైతు పాల్గొన్నారు.

ఇదీ చూడండి: బెల్లంపల్లిలో మరో రెండు ఉపరితల గనులు..