కస్తూర్బా పాఠశాలలో జిల్లా విద్యాధికారి విచారణ

బెజ్జురు కస్తూర్బా విద్యార్థినుల ఆందోళన రెండో రోజూ కొనసాగింది. వీరికి మద్దతుగా తల్లిదండ్రులు కూడా ధర్నాకు దిగారు. విధుల్లో నిర్లక్ష్యం చేస్తున్న ఎస్​ఓను తొలగించాలంటూ డిమాండ్​ చేశారు. స్పందించిన జిల్లా విద్యాధికారి భిక్షపతి విచారణకు ఆదేశించారు.

కుమురం భీం జిల్లా బెజ్జురు మండలం కస్తూర్బా ఆశ్రమ పాఠశాలలో మెనూ ప్రకారం భోజనం పెట్టడం లేదంటూవిద్యార్థినులు స్వీయ నిర్బంధం చేసుకున్నారు. ఈ విషయం తెలుసుకున్న విద్యార్థినుల తల్లిదండ్రులు పాఠశాల ముందు ధర్నా చేశారు. నిర్లక్ష్యం వహిస్తున్న ఎస్.ఓ అమూల్యను విధుల నుంచి తొలగించాలని డిమాండ్ చేశారు.

జిల్లా విద్యాధికారి భిక్షపతి జరిగిన ఘటనపై విచారణ చేపట్టారు. విద్యార్థినులతో మాట్లాడి వారి సమస్యను తెలుసుకున్నారు. మెనూ ప్రకారం భోజనం పెట్టడం లేదని.. రోజు అల్పాహారం కిచిడి పెడుతున్నారని విద్యార్థినులుతెలిపారు. మధ్యాహ్న భోజనంలో సన్న బియ్యం బదులు దొడ్డు బియ్యం వడ్డిస్తున్నారని అన్నారు. ఆహార పట్టిక ప్రకారం తమకు భోజనం ఎందుకు పెట్టడం లేదని ఎస్.ఓ. అమూల్యను అడిగితే తమను కొట్టి తిడుతుందని ఆవేదన వ్యక్తం చేశారు. బాలికల నుంచి లిఖిత పూర్వక ఫిర్యాదు తీసుకున్నారు. అనంతరం సమస్యను పరిష్కరిస్తామని హామీ ఇచ్చారు.

ఇవీ చూడండి: వేసవికి ముందే అడుగంటేశాయి