నిరుద్యోగ వారంలో భాగంగా ప్రతి మంగళవారం నిరుద్యోగ నిరాహార దీక్ష చేపడుతున్న వైఎస్ షర్మిల.. ఖమ్మం జిల్లా పెనుబల్లిలో దీక్ష చేపట్టారు. ఉదయం 11 గంటల నుంచి సాయంత్రం 6 గంటల వరకు నిరాహార దీక్ష కొనసాగించారు. పెనుబల్లి మండలం గంగాదేవిపాడులో ఇటీవల ఆత్మహత్య చేసుకున్న నిరుద్యోగ యువకుడు నాగేశ్వరరావు కుటుంబాన్ని పరామర్శించిన షర్మిల.. బాధిత ఇంటికి వెళ్లి కుటుంబసభ్యులను ఓదార్చారు. ధైర్యంగా ఉండాలని భరోసా ఇచ్చారు. అనంతరం పెనుబల్లి మండల కేంద్రంలో వైఎస్ విగ్రహానికి పూలమాల వేసి నిరుద్యోగ నిరాహార దీక్ష చేపట్టారు.
రాష్ట్రంలో నిరుద్యోగుల పక్షాన పోరాడేందుకే ప్రతి మంగళవారం నిరాహార దీక్ష చేపట్టినట్లు షర్మిల పేర్కొన్నారు. రాష్ట్రంలో కేవలం ఏడేళ్లలోనే దాదాపు నాలుగు రెట్లు నిరుద్యోగులు పెరిగారని ఆరోపించారు. ఇందుకు ప్రభుత్వ నిర్లక్ష్యమే కారణమన్నారు. సీఎం కేసీఆర్ ఫామ్ హౌస్కు పరిమితమైనందునే యువకులు ఆత్మహత్యలకు పాల్పడుతున్నారని విమర్శించారు. ఎంతమంది నిరుద్యోగులు ఆత్మహత్యలు చేసుకున్నా.. కేసీఆర్లో చలనం రావడం లేదని ఆక్షేపించారు. నిరుద్యోగం అత్యధికంగా ఉన్న రాష్ట్రంలో తెలంగాణ ఒకటిగా ఉందని ఆమె గుర్తు చేశారు.
ఏడేళ్ల నుంచి ఉద్యోగ నియామక నోటిఫికేషన్లు లేక వయో పరిమితి కోల్పోయిన వేలాది మంది నిరుద్యోగులకు వయో పరిమితి పెంచాలని షర్మిల డిమాండ్ చేశారు. ఉన్నత చదువులు చదివినా.. ఉద్యోగాలు రాక ఎంతోమంది నిరుద్యోగులు ఆత్మహత్యలకు పాల్పడుతున్నారని షర్మిల మండిపడ్డారు. రాష్ట్రంలో నిరుద్యోగ యువత ఆత్మహత్యలన్నీ ప్రభుత్వ హత్యలేనన్నారు. ఈ సందర్భంగా నిరుద్యోగులు, యువత ధైర్యం కోల్పోవద్దని.. త్వరలోనే మంచి రోజులు వస్తాయని అన్నారు. రెండేళ్ల తర్వాత కేసీఆర్ ప్రభుత్వం పోయి.. వైఎస్ఆర్ ప్రభుత్వం రావడం ఖాయమన్నారు.
నిరుద్యోగ నిరాహార దీక్షలో ప్రజా గాయకుడు ఏపూరి సోమన్న బృందం ఆటాపాటా ఉర్రూతలూగించింది. సాయంత్రం 6 గంటల సమయంలో రిటైర్డ్ సీఐ నర్సింహారెడ్డి కుటుంబసభ్యులు షర్మిలకు నిమ్మరసం ఇచ్చి దీక్ష విరమింపజేశారు.
ఇదీ చూడండి: SHARMILA: పెనుబల్లిలో షర్మిల నిరుద్యోగ నిరాహార దీక్ష
