wrong transaction in Khammam : రూ.లక్ష కాదు.. రెండు లక్షలు కాదు.. ఏకంగా ఓ వ్యక్తి ఖాతాలో రూ.2 కోట్లు జమయ్యాయి. తొలుత ఆశ్చర్యానికి గురైన ఆయన తేరుకుని వివరాలు ఆరా తీసి ఆ సొమ్మును బదిలీ చేశారు. ఖమ్మం జిల్లా వైరా మండలం సిరిపురం గ్రామానికి చెందిన గంధం వెంకటేశ్వర్లు వ్యాపారి. వైరాలోని తహసీల్దార్‌ కార్యాలయం ఎదురుగా భవన సముదాయం ఉంది. హైదరాబాద్‌ ఉప్పల్‌కు చెందిన ఓ సంస్థ వారు అందులో బ్రాంచి ఏర్పాటు చేశారు. యజమాని వెంకటేశ్వర్లు ఖాతాలో నెలనెలా అద్దెను జమ చేస్తుంటారు.
wrong transaction in Wyra : ఈ నెల 19న ఆయన ఖాతాలో ఆ సంస్థ నుంచి రూ.2 కోట్ల నగదు జమైందంటూ ఎస్‌ఎంఎస్‌ వచ్చింది. బ్యాంకులో ఆరా తీయగా అధికారులు నిజమేనని ధ్రువీకరించారు. వెంటనే సమాచారం ఇవ్వగా.. క్లర్కు పొరపాటుగా వేరొకరికి పంపాల్సిన మొత్తాన్ని వెంకటేశ్వర్లు ఖాతాకు జమ చేసినట్టు ఆ సంస్థ గుర్తించింది. మంగళవారం ఆయన ఆ మొత్తాన్ని ఆ సంస్థ ఖాతాకు మళ్లించారు.
