సమస్యల నెలవుగా... వైరా పురపాలక సంఘం

నగరపంచాయతీ నుంచి పురపాలక సంఘమైతే పట్టణ రూపురేఖలే మారిపోతాయని కలలుగన్నారు. సకల సౌకర్యాలు సమకూరుతాయని ఊహల్లో తేలారు. కానీ పేరు గొప్ప ఊరు దిబ్బ అన్నట్లుగా మారింది ఖమ్మం జిల్లా వైరా మున్సిపాలిటీ పరిస్థితి.

ఖమ్మం జిల్లా వైరా పురపాలక సంఘంగా ఏర్పడి ఏడాది గడుస్తున్నా నేటికి పంచాయతీ స్థాయి సేవలే అమలవుతున్నాయి. చాలీ చాలనీ సిబ్బంది, నిధుల కొరతతో ఎక్కడి సమస్యలు అక్కడే పేరుకుపోతున్నాయి. పట్టణంలో ఏ కూడలి చూసినా బురదమయం. పర్యటక ప్రాంతంగా గుర్తింపు పొందిన వైరా జలాశయానికి వెళ్లే రహదారికి ఇరువైపులా మురుగుతో నిండి ఉంది. జిల్లాలో వివిధ ప్రాంతాల నుంచి వచ్చే పర్యటకులు రహదారిని చూసే వెనుదిరుగుతున్నారు. బస్టాండ్‌ ప్రాంగణం, డీఎస్పీ కార్యాలయం, మధిర రోడ్‌, ఖమ్మం-రాజమండ్రి జాతీయ రహదారి వెంట చాలా రోజులుగా నీరు నిలిచి పాకుడు పడుతున్నాయి.

అవస్థలు పడుతున్న జనం

నరగరపంచాయతీగా ఉన్నప్పుడు వైరాలో సోమవరం, గండగుల పాడు, బ్రాహ్మణపల్లి మాత్రమే ఉన్నాయి. కొణిజర్ల మండలంలోని దుద్దెపుడి, పల్లిపాడు, లాలాపురం, శాంతినగర్​ను విలీనం చేసి 31వేల జనాభా, 23వేల మంది ఓటర్లతో 20 వార్డులుగా విభజించి మున్సిపాలిటీగా ఏర్పాటు చేశారు. విలీన గ్రామాల్లో పంచాయతీ పనులు చేయక, పురపాలక సౌకర్యాలకు నోచుకోక... రెంటికి చెడ్డ రేవడిలా తయారయ్యాయి. గతంలో పంచాయతీ సిబ్బంది పర్యవేక్షణలో ఉన్న పల్లెల్ని... ఇప్పుడు పట్టించుకునే నాథుడే లేక నానా అవస్థలు పడుతున్నారు.

ఆందోళన చేపట్టిన పట్టణవాసులు

ఖమ్మం-రాజమండ్రి జాతీయ రహదారి వెంట రెండు కిలోమీటర్ల బారున వైరా పట్టణంలో అనేక సమస్యలున్నాయి. మురుగునీరు నిలిచి దోమలు పెరిగి చుట్టుపక్కల వారు రోగాల బారిన పడుతున్నారు. మున్సిపాలిటీకి డంపింగ్ యార్డ్ లేకపోవటం వల్ల ఎక్కడపడితే అక్కడ వ్యర్థాలు పడేస్తున్నారు. అధికారులకు ఎన్నిసార్లు మొరపెట్టుకున్నా... స్పందన కరవైందని స్థానికులు ఆవేదన వ్యక్తం చేస్తున్నారు. పట్టణంలో రెండు కిలోమీటర్లు డివైడర్లు ఉన్నప్పటికీ ఏడాదిగా సెంట్రల్‌ లైటింగ్‌ పనిచేయకపోవడం వల్ల దొంగతనాలు ఎక్కువగా జరుగుతున్నాయి. పట్టణానికి మిషన్‌ భగీరథ నీరు సరఫరా లేదు. పురాతన సుజలాం పథకం నుంచే వస్తాయి. పైపులు లీకవుతూ బురదనీరు వస్తున్నాయని పట్టణవాసులు ఆందోళన చేపట్టారు.

అభివృద్ధికి అడ్డంకి

కోతుల బెడదతో తెలంగాణ గురుకుల విద్యాలయం, సాంఘిక సంక్షేమ గురుకులం విద్యార్థులు, స్థానికులు నిత్యం అవస్థలు పడుతున్నారు. స్థానికంగా ఆదాయ వనరులు ఎక్కువగా ఉన్నప్పటికీ... సమస్యల పరిష్కారంలో అధికారులు విఫమవుతున్నట్లు తెలుస్తోంది. ఏడాదిలో ముగ్గురు కమిషనర్​లు మారడం అభివృద్ధి పనులకు అడ్డంకిగా మారిందంటున్నారు పురవాసులు.

సమస్యలు పరిష్కరించండి

మాజీ ఎంపీ పొంగులేటి శ్రీనివాసరెడ్డి, ఎమ్మెల్యే రాములు నాయక్‌ సహకారంతో రూ.20 కోట్లు అభివృద్ధి నిధులు మంజూరయ్యాయని అధికారులు తెలిపారు. అవసరాల్ని సమకూర్చుకుంటూ... సమస్యల పరిష్కరిస్తామని చెబుతున్నారు. అధికారులు త్వరగా అభివృద్ధి పనులు చేపట్టి.. మురుగు, పారిశుద్ధ్యం సమస్యల నుంచి తమను రక్షించాలని వైరా వాసులు కోరుతున్నారు.

ఇదీ చూడండి: వృద్ధుడి ప్రాణాలు కాపాడిన యువకుని సెల్ఫీ క్రేజ్!