లోక్​సభలో బిల్లుల ఆమోదమే కాదు సమస్యలపై చర్చ జరగాలి : నామా

లోక్‌సభలో పెండింగ్ బిల్లులు ఆమోదమే లక్ష్యంగా అజెండా రూపొందించారని తెరాస లోక్‌సభాపక్ష నేత నామా నాగేశ్వరరావు అన్నారు. సమావేశాల్లో జీఎస్టీ నిధులు, కరోనా, వలస కార్మికుల సమస్యలపై చర్చించాలని కోరారు. నిరుద్యోగం, సరిహద్దు వివాదాలు, ఆర్థిక ప్రగతిపై చర్చించాలన్నారు. రాష్ట్రాలకు సంబంధించిన అంశాలు పార్లమెంటులో లేవనెత్తుతామని స్పష్టం చేశారు.

కరోనా సంక్షోభం వేళ... కేవలం బిల్లుల ఆమోదం కోసమే కాకుండా దేశం ఎదుర్కొంటున్న సమస్యలపై పార్లమెంటులో చర్చ జరగాలని తెరాస లోక్‌సభాపక్ష నేత నామా నాగేశ్వరరావు తెలిపారు. బిల్లులే కాకుండా ప్రస్తుత సమస్యలు కూడా పరిగణలోకి తీసుకోవాలని అన్నారు. బిల్లుల వివరాలపై ఈ నెల15న చర్చిద్దామని స్పీకర్ చెప్పినట్లు నామా వెల్లడించారు. రాష్ట్రానికి సంబంధించిన అంశాలు పార్లమెంటులో లేవనెత్తుతామన్నారు.

దాన్ని వ్యతిరేకిస్తాం..

విద్యుత్‌ బిల్లు వచ్చే అవకాశం ఉందని.. దాన్ని వ్యతిరేకిస్తామని స్పష్టం చేశారు. 11 ఆర్డినెన్స్‌లను కేంద్రం పార్లమెంటులో ప్రవేశ పెట్టబోతోందని పేర్కొన్నారు. ఈ సమావేశాల్లో మొత్తం 25 బిల్లులు ఉండగా... వాటిల్లో కొన్ని ప్రజావ్యతిరేక బిల్లులు ఉన్నట్లు తెలుస్తోందని నామా సందేహం వ్యక్తం చేశారు.

గళం వినిపిస్తాం..

ఈ సమావేశాల్లో ప్రవేశపెట్టాలనుకుంటున్న 25 బిల్లుల్లో... ప్రజావ్యతిరేకమైన వాటిపై తమ గళం వినిపిస్తామని పేర్కొన్నారు. నిరుద్యోగం, సరిహద్దు వివాదాలు, ఆర్థిక ప్రగతితో పాటు రాష్ట్రాలకు సంబంధించిన అంశాలపై సభలో చర్చ జరగాలంటున్న నామా నాగేశ్వరరావుతో ఈటీవీ భారత్ ప్రతినిధి ముఖాముఖి.

ఇవీ చూడండి : ఎల్​ఆర్​ఎస్​కు భారీ సంఖ్యలో దరఖాస్తులు