Khammam district students in Ukraine: ఉక్రెయిన్లో చిక్కుకుపోయిన తెలుగు విద్యార్థుల పరిస్థితి అత్యంత దయనీయంగా ఉంది. ఉన్నత చదువులు, ఉపాధి కోసం వెళ్లి.. యుద్ధ వాతావరణంలో చిక్కుకుని విలవిల్లాడుతున్నారు. ఉమ్మడి ఖమ్మం జిల్లా వ్యాప్తంగా పలువురు విద్యార్థులు, యువత.. వైద్య విద్య, ఉద్యోగాల కోసం ఉక్రెయిన్కు తరలివెళ్లారు. ప్రస్తుత పరిస్థితుల్లో స్వదేశానికి తరలివచ్చే మార్గం లేక.. అక్కడ సరైన సమాచారం ఇచ్చే వారు లేక అవస్థలు ఎదుర్కొంటున్నారు. గురువారం రాత్రి నుంచి నిద్రాహారాలు కరవై భయభయంగా కాలం వెళ్లదీస్తున్నారు.
తల్లిదండ్రుల ఆందోళన
ఖమ్మం జిల్లా తిరుమలయపాలెం మండలం మెడిదపల్లి పాలెం గ్రామానికి చెందిన రావుల మహేశ్ రెడ్డి.. ఆరు నెలల క్రితం హోటల్ మేనేజ్మెంట్ కోసం ఉక్రెయిన్ వెళ్లారు. ఉక్రెయిన్ మీద యుద్ధ మేఘాలు కమ్ముుకోవడంతో.. మహేశ్ తల్లిదండ్రులు ఉపేందర్ రెడ్డి, వెంకట నర్సమ్మ ఆందోళన చెందుతున్నారు. తమ కుమారుడిని క్షేమంగా ఇంటికి తీసుకురావాలని ఫిర్యాదు చేశారు. తమ కుమారుడిని క్షేమంగా ఇంటికి చేర్చేందుకు కేంద్ర, రాష్ట్ర ప్రభుత్వాలు తగిన చర్యలు చేపట్టాలని మీడియాతో వేడుకున్నారు.
ఉక్రెయిన్లో భీకర పరిస్థితులతో ఆందోళన చెందుతున్నట్లు మహేశ్ సెల్ఫీ వీడియోలో వివరించారు. త్వరగా భారత ప్రభుత్వం చర్యలు తీసుకోవాలని వేడుకున్నారు.
'గురువారం రాత్రి ఒడిశాలో క్లిష్ట పరిస్థితులు ఉండటంతో.. రైల్లో లెవీకి తరలివచ్చాం. ఇక్కడి నుంచి రవాణా సౌకర్యం ఉందన్నారు. కానీ ఇక్కడికి వచ్చాక మాకు ఎటువంటి సదుపాయాలు కల్పించడం లేదు. ఇక్కడ తలదాచుకోవడానికి కూడా స్థలం లేకపోవడంతో.. ఏం చేయాలో పాలుపోవడం లేదు. కనీసం క్యాబ్లు కూడా నడవడం లేదు. దాదాపు 300 మంది వరకు ఇక్కడే చిక్కుకుపోయాం. ఈ విషయంపై ఇండియన్ ఎంబసీ స్పందించి.. మమ్మల్ని త్వరగా స్వదేశానికి తరలించాలని వేడుకుంటున్నాం.' -మహేశ్, బాధితుడు
ఉమ్మడి జిల్లా నుంచి అనేక మంది
ఇప్పటివరకు అందిన సమాచారం ప్రకారం ఉభయ జిల్లాలకు చెందిన చాలామంది విద్యార్థులు ఉక్రెయిన్లోని పలు పట్టణాల్లో ఉంటున్నారు. వైద్య విద్య అభ్యసించేందుకు వెళ్లిన వారు అధికంగా ఉండగా.. మరికొందరు హోటల్ మేనేజ్మెంట్ కోర్సులు చేసేందుకు వెళ్లిన వారున్నారు. ఇంకా కొంత మంది యువత ఉద్యోగాల కోసం వెళ్లి.. యుద్ధం కారణంగా అక్కడే చిక్కుకున్నారు. వీరంతా ఉక్రెయిన్ రాజధాని కీవ్తోపాటు వినీష్టియా, ఇవానో, ఫ్రాంక్విస్క్, ఖార్కివ్ తదితర నగరాల్లో ఉంటున్నారు.
"ప్రస్తుతం యూనివర్సిటీ హాస్టళ్లో అయితే సురక్షితంగా ఉన్నాం. కానీ ఎప్పుడు ఏం జరుగుతుందో అర్థం కావడం లేదు. సర్టిఫికెట్స్, పాస్పోర్టులు సిద్ధంగా ఉంచుకోమన్నారు. ఏదైనా క్లిష్ట పరిస్థితి వస్తే వేరే ప్రాంతానికి తరలివస్తాం. ఇండియన్ ఎంబసీకి కాంటాక్టు అవడానికి అక్కడి నుంచి ఎమర్జెన్సీ ఫోన్ నంబర్లు ఇచ్చారు." -బాధితురాలు
భయంభయంగా
యుద్ధం ప్రారంభమైన రోజు నుంచీ గంట గంటకూ తమ పిల్లల యోగ క్షేమాలను తల్లిదండ్రులు తెలుసుకుంటున్నారు. ఎప్పటికప్పుడు క్షేమ సమాచారం తెలుసుకుంటూనే బంధువులు, స్నేహితులు ధైర్యం చెబుతున్నారు. అయితే ఎప్పుడు ఎక్కడ నుంచి బాంబుల మోత వినాల్సివస్తుందోనన్న భయంతో.. అక్కడ ఉన్న విద్యార్థులు, ఇక్కడున్న తల్లిదండ్రులు ఆందోళన చెందుతున్నారు. వీరంతా సురక్షిత ప్రాంతాల్లోనే ఉన్నప్పటికీ అక్కడి పరిస్థితులు ఎప్పుడు ఎలా మారుతాయో తెలియక ఆందోళన నెలకొంది. తమ పిల్లలను క్షేమంగా స్వస్థలాలకు చేర్చేలా కేంద్ర, రాష్ట్ర ప్రభుత్వాలు చొరవ చూపాలని తల్లిదంద్రులు కోరుతున్నారు.
