తెరాస లోక్సభ పక్షనేత, ఖమ్మం ఎంపీ నామ నాగేశ్వర రావు మరోసారి తన దాతృత్వాన్ని చాటుకున్నారు. జిల్లా ప్రజలకు మెరుగైన వైద్యసేవలు అందించేందుకు రూ. 1.23కోట్ల వ్యయంతో ఆరు నూతన అంబులెన్స్లను అందించారు. ఆ వాహనాలను ప్రగతి భవన్లో తెరాస కార్యనిర్వాహక అధ్యక్షుడు కేటీఆర్ జెండా ఊపి ప్రారంభించారు.
సొంత ఖర్చుతో అంబులెన్స్లను ఏర్పాటు చేసిన ఎంపీ నామ నాగేశ్వరరావును రాష్ట్ర మంత్రులు కేటీఆర్, పువ్వాడ అజయ్ అభినందించారు. ఈ వాహనాలను ఖమ్మం జిల్లా పరిధిలోని పాలేరు, వైరా, మధిర, సత్తుపల్లి, అశ్వారావుపేట, కొత్తగూడెం నియోజకవర్గ కేంద్రాల్లో గల ప్రభుత్వ ఆసుపత్రులకు జిల్లా వైద్య ఆరోగ్య శాఖ ద్వారా అందజేస్తామని ఎంపీ తెలిపారు. ఏదైనా ప్రమాదం జరిగినప్పుడు సమయం వృధా కాకుండా బాధితులను నిర్ణీత (గోల్డెన్ అవర్) సమయంలో హాస్పిటల్కు తరలించడంతో పాటుగా క్షతగాత్రులను ప్రాణాపాయం నుంచి కాపాడడానికి అవకాశం ఉంటుంది. సోమవారం సాయంత్రానికి ఈ వాహనాలు ఖమ్మం చేరుకోనున్నాయి.
అత్యాధునిక సదుపాయాలు
క్షతగాత్రులను తరలించే క్రమంలో వారికి ప్రాణాపాయం నుంచి కాపాడడానికి ఆక్సిజన్, వెంటిలేటర్తో సహా అత్యాధునిక సదుపాయాలు ఈ అంబులెన్స్లో ఉన్నాయి. ఉమ్మడి ఖమ్మం జిల్లా ప్రజల సంక్షేమం కోసం ఆరు అంబులెన్స్లను అందించడం పట్ల జిల్లా ప్రజలు, ప్రజాప్రతినిధులు రాజకీయాలకతీతంగా ఆయనకు కృతజ్ఞతలు తెలిపారు. ఈ కార్యక్రమంలో ఎంపీ రంజిత్ రెడ్డి, ఎమ్మెల్సీ పి.మహేందర్ రెడ్డి, సత్తుపల్లి ఎమ్మెల్యే సండ్ర వెంకట వీరయ్య, వైరా ఎమ్మెల్యే రాములు నాయక్, ఆర్మూర్ ఎమ్మెల్యే జీవన్ రెడ్డి, ఫోర్స్ మోటార్ ప్రతినిధులు తదితరులు పాల్గొన్నారు.
ఇదీ చదవండి: సీఎం ఫొటో లేదని బ్రోచర్ ఆవిష్కరణకు తిరస్కరించిన మంత్రి
