Graduate Is Cultivates Vegetables In Jagityala : చిన్నప్పటి నుంచి వ్యవసాయ పనుల్లో కన్నవారికి చేదోడు వాదోడుగా ఉండేవాడు జగిత్యాల జిల్లా గొల్లపల్లి మండలం బొంకూరు గ్రామానికి చెందిన సుమన్. అలాగే చదువుల్లోనూ రాణించేవాడు. 2015లో గ్యాడ్యుయేషన్ పూర్తి చేసి.. కొన్నాళ్లు గూగుల్ నావిగేషన్ ప్రాసెసర్గా ఉద్యోగం చేసి.. చాలీచాలని జీతంతో ఆర్థిక ఇబ్బందులు ఎదుర్కొన్నాడు. మనసుకు నచ్చిన పనిచేస్తే బాగుంటుందని భావించి.. ఆ కొలువును వదిలేసి మరీ తల్లిదండ్రుల ప్రోత్సాహంతో వ్యవసాయం సాగులోకి అడుగుపెట్టాడు.
ఆ బాటలో మొదటగా ఎలాంటి సాగు చేయాలని ఆలోచించాడు. వరి పండిస్తే ఆదాయం కంటే ఖర్చులే ఎక్కువగా ఉంటాయని అంచనా వేసుకొని.. ప్రస్తుతం మార్కెట్లో ఏ ఏ పంటలకు డిమాండ్ ఉందో తెలుసుకున్నాడు. ప్రస్తుతం జగిత్యాల ప్రాంతంలో కూరగాయలకు అధిక డిమాండ్ ఉందని గ్రహించి.. తనకు తండ్రి నుంచి వచ్చిన ఎకరం భూమిలో తీగజాతి పంట బీరకాయ సాగును ప్రారంభించాడు. ఈ పంట అయితే అక్కడి వాతావరణానికి సరిపోతుందని భావించాడు. అందులోనే అంతరపంటగా టమోటా, చిక్కెడు వంటి వాటిని పండిస్తున్నాడు. ఇప్పటివరకు బాగానే దిగుబడి వస్తూ.. రోజుకు బీరకాయ క్వింటా మేర కాపు కాస్తోందని సుమన్ తెలిపాడు. మంచి రాబడులు సంపాదించిన తర్వాత.. పంటను విస్తరించడానికి కూనుకున్నాడు. ఒక ఎకరం నుంచి రెండెకరాలకు సాగును వృద్ధి చేశాడు.
"నాకు చదువు అయిపోయిన తర్వాత ప్రయివేట్ కంపెనీలో జాబ్ వచ్చింది. ఆ జాబ్ నచ్చక ఇంటికి తిరిగి వచ్చి.. తల్లిదండ్రుల ప్రోత్సాహంతో వ్యవసాయం మొదలుపెట్టాను. ఇప్పుడు లాభాలు అనేవి వస్తున్నాయి. వరి కంటే తీగజాతి కూరగాయలు ఎక్కువ లాభాలు ఇస్తున్నాయి. 2015లో ఎకరాతో ప్రారంభమైన ప్రయాణం ఇప్పుడు రెండు ఎకరాల వరకు విస్తరించింది. సరైన యాజమాన్య పద్ధతులు పాటిస్తే మార్కెటింగ్కు పెద్దగా కష్టపడాల్సిన అవసరం లేదు. రోజును నేను క్వింటా బీరకాయలు మార్కెట్లో అమ్ముతున్నాను." - సుమన్, యువ రైతు
తీగ జాతి పంటలకు ప్రభుత్వం ఆర్థిక సాయం ప్రకటించాలి : రోజూ క్వింటా వరకు బీరకాయలను మార్కెట్కు సరఫరా చేస్తున్నట్లు తెలిపాడు. అది చూసి సుమన్ స్నేహితులు సైతం ఈ మార్గంలోకి రావడానికి సన్నద్ధమవుతున్నట్లు తెలిపారు. గతంలో తీగజాతి పంటలకు ప్రభుత్వం తగు ఆర్థిక సహాయం అందిచేదని.. దీనితో రైతులు కూరగాయల సాగుపట్ల ఆసక్తి చూపేవారని సుమన్ పేర్కొన్నాడు. ప్రస్తుతం ఈ సబ్సిడీని ఇవ్వడం లేదని.. తిరిగి ఆర్థిక సహాయాన్ని అందిస్తే మరింత మంది కూరగాయల సాగు చేసేందుకు ముందుకు వస్తారని ప్రభుత్వానికి విజ్ఞప్తి చేశాడు.
Young Farmer Vegatable Farming In Jagitayal : ప్రస్తుతం సొంత ఊరిలో వ్యవసాయం చేసుకుంటూ.. తల్లిదండ్రులకు అండగానని సుమన్ తెలిపాడు. డిమాండ్కు అనుగుణంగా పంటలు పండిస్తే.. వ్యవసాయం దండగలా కాక పండగలా సాగుతుందని ఈ యువరైతు హితవు పలికాడు. యువత చదువులు పూర్తికాగానే ఉద్యోగాల కోసం.. పట్టణాల వైపు పరుగులు మాని వ్యవసాయంపై దృష్టి సారిస్తే బాగుంటుందని కోరాడు.
ఇవీ చదవండి :
