పుడమిలోనూ 'స్త్రీ' ఉపాధి

పురుషులతో పాటు స్త్రీలకు ఉద్యోగ, ఉపాధిలో సమాన అవకాశాలు కల్పించే దిశగా ప్రభుత్వం అడుగులు వేస్తోంది. కేంద్రం గనుల చట్టాన్ని సవరిస్తూ... భూగర్భంలో మహిళలు పనిచేసేందుకు అనుమతిచ్చింది.

మహిళా సాధికారతను పెంచే దిశగా సింగరేణి గనుల్లో పనిచేసేందుకు తొలిసారిగా అతివలకు అవకాశం కల్పించారు. భూగర్భ గనుల్లో మగువలు పనిచేయడానికి గనుల చట్టం 1952లోని నిబంధనలు సవరిస్తూ కేంద్ర ప్రభుత్వం గెజిట్ జారీ చేసింది. ఈ నిర్ణయంతో బొగ్గు, బంగారం గనులు, చమురు క్షేత్రాల్లో మహిళలకు ఉపాధి అవకాశాలు లభించనున్నాయి.

ఇప్పటి వరకు సింగరేణి వర్క్ షాపు బ్లాస్టింగ్ తయారీ షెడ్​లలో మాత్రమే మహిళలు పనిచేస్తున్నారు. గనుల్లో ఉపయోగించే యంత్రాలను 35 ఏళ్లుగా వీరే మరమ్మతులు చేస్తున్నారు. ఇకపై గనుల్లోనూ ప్రవేశం లభించనుంది. మగవారికి దీటుగా పనిచేస్తామని ధీమా వ్యక్తం చేస్తున్నారు.
సింగరేణి పాలిటెక్నిక్ కళాశాల, పారిశ్రామిక శిక్షణ విద్యార్థినిలు ఈ నిర్ణయంపై హర్షం వ్యక్తం చేశారు. తాము చదువుతున్న సంస్థలోనే ఉద్యోగాలు లభిస్తాయని సంతోష పడుతున్నారు.