కరీంనగర్ జిల్లా సైదాపూర్లో గంజాయి సరఫరా చేస్తున్న ఘరానా ముఠాను పోలీసులు అరెస్ట్ చేశారు. గత కొంతకాలంగా గుట్టుచప్పుడు కాకుండా నడుపుతున్న అక్రమ దందాను పక్కప్రణాళికతో పోలీసులు గుట్టురట్టు చేశారు. ఆరుగురు నిందితులను అదుపులోకి తీసుకున్నారు. లక్షా 18 వేల రూపాయల విలువైన 5 కిలోల గంజాయి, 2 ద్విచక్ర వాహనాలను స్వాధీనం చేసుకున్నట్లు హుజురాబాద్ ఏసీపీ శ్రీనివాసరావు తెలిపారు.
నిందితులు జల్సాలకు అలవాటు పడి... సులభంగా డబ్బులు సంపాదించాలనే ఉద్దేశంతో ఈ దందాను మొదలుపెట్టారని పోలీసులు వెల్లడించారు. ఆరుగురు ఒక ముఠాగా ఏర్పడి... ములుగు జిల్లాలో గుర్తు తెలియని వ్యక్తి నుంచి గంజాయిని కొనుగోలు చేస్తున్నారన్నారు. సైదాపూర్ మండలంలోని గుండ్లపల్లిని కేంద్రంగా చేసుకుని.. యువకులు, విద్యార్థులకు విక్రయిస్తున్నారని పోలీసులు తెలిపారు.
